Որտեղից Իսրայելը կարող է հարվածել Իրանին. Արցախում արդեն պլացդարմ է ստեղծվել

Գերմանիայի արտաքին գործերի նախարար Անալենա Բարբոքը Իրանին և Իսրայելին կոչ է արել «առավելագույն զսպվածություն» ցուցաբերել՝ կապված Մերձավոր Արևելքում մեծ հակամարտության սպառնալիքի հետ։

Բարբոքը գտնվում էր Իսրայելում՝ ճգնաժամի կարգավորման բանակցությունների համար։ Մեծ Բրիտանիայի արտգործնախարար Դեյվիդ Քեմերոնի հետ նա հանդիպումներ է ունեցել վարչապետ Բենիամին Նեթանյահուի և նախագահ Իսահակ Հերցոգի հետ։

Կառավարության ղեկավարը շնորհակալություն է հայտնել արեւմտյան երկրներին Իրանի հարձակումը հետ մղելու հարցում Իսրայելին աջակցելու համար, սակայն որոշում կայացնելիս հայտարարել է Իսրայելի անկախությունը։

Մեծ Բրիտանիայի արտաքին գործերի նախարար Դեյվիդ Քեմերոնը Իսրայել կատարած այցի ժամանակ հայտարարել է, որ հրեական պետությունը որոշել է հակահարված տալ Իրանին՝ շաբաթավերջին իրականացրած օդային հարձակման համար, հայտնում է Reuters-ը։

«Մենք հուսով ենք, որ նրանք դա կանեն այնպես, որ հնարավորինս պակաս նպաստեն իրավիճակի սրմանը», – հավելել է Քեմերոնը:

Մեծ Բրիտանիան ցանկանում է տեսնել Իրանի դեմ G7-ի երկրների կողմից համակարգված պատժամիջոցները, երբ G7-ի արտաքին գործերի նախարարներն այս շաբաթ հանդիպեն Իտալիայում, ասել է նա:

Իրանի իշխանությունները պատրաստվում են Իսրայելի պատասխան հարվածին իրանական տարածքի ուղղությամբ և իր անձնակազմի ու վստահված անձանց դեմ գրոհներին` այլ երկրների տարածքում: Այս մասին գրել է The Wall Street Journal թերթը։

Թերթի տվյալներով` Իրանն ապրիլի 17-ին հայտարարել է, որ իր ռազմաօդային ուժերը պատրաստում է հարվածների, իսկ իր ռազմածովային նավատորմը կսկսի Կարմիր ծովում ուղեկցել իրանական առևտրական նավերին:

«Թեհրանը նաև սկսել է անձնակազմի տարհանումը Սիրիայում գտնվող օբյեկտներից, որտեղ մեծ ներկայություն ունի Իսլամական հեղափոխության պահապանների կորպուսը», – հրատարակությանը հայտնել են սիրիացի և իրանցի պաշտոնյաներն ու խորհրդականները:

«Իրանական «Մասաֆ» ուղեղային կենտրոնի ղեկավար, Իրանի Իսլամական հեղափոխության պահապնների կորպուսին մոտ կանգնած վերլուծաբան Ալի-Աքբար Ռայեֆիփուրը X-ի (նախկին Թվիթեր) միջոցով գրառում է կատարել այն մասին, որ Իսրայելի բարեկամ Բաքվի բարբարոսական վարչախումբը համաձայնել է Իրանի դեմ օդային հարձակումների համար «ազատ աշխարհին» տրամադրել այս պետության հետ սահմանին մոտ գտնվող երեք ռազմակայան։

Ըստ ամենայնի, դրանից առնվազն մեկը բռնազավթված Արցախի Հանրապետության Վարանդայի օդանավակայանն է։

Եթե նույնիսկ այս տեղեկատվությունը չի համապատասխանում իրականությանը, ապա նման քարոզչական հոսքի ապահովումն իրանցի ոչ անհայտ վերլուծաբանի կողմից չի կարող պատահական համարվել և լուրջ զգուշացում է արհեստածին Ադրբեջանին”։

Այս մասին գրել է ԵՊՀ Արևելագիտության ֆակուլտետի Իրանագիտության ամբիոնի վարիչ, իրանագետ Վարդան Ոսկանյանը։