Իրանը հայտարարել է, որ մի քանի անօդաչու սարք է խոցել

BBC

Իրանի իշխանությունները հայտարարել են, որ մի քանի անօդաչու թռչող սարքեր են խոցել և հերքել երկրի վրա Իսրայելի հրթիռային հարձակման մասին տեղեկությունները: Ավելի վաղ իրանական լրատվամիջոցները հայտնել էին Իրանի կենտրոնական Սպահան քաղաքի շրջանում պայթյունների և տարբեր շրջաններում հակաօդային պաշտպանության աշխատանքի մասին։

«Մի քանի անօդաչու թռչող սարքեր հաջողությամբ խոցվել են երկրի հակաօդային պաշտպանության կողմից, սակայն հրթիռային հարձակման մասին դեռ տեղեկություն չկա», – գրել է Իրանի տիեզերական գործակալության խոսնակ Հոսեյն Դալիրյանը X սոցիալական ցանցում։

Ավելի վաղ CBS News-ը և ABC News-ը, վկայակոչելով ամերիկացի պաշտոնյաներին, հայտնել էին, որ Իսրայելը հրթիռներ է արձակել Իրանի ուղղությամբ։ Սպիտակ տունն ու Պենտագոնն այս մասին չեն մեկնաբանել։

«Մենք այս պահին մեկնաբանություն չունենք», – AFP-ին ասել է իսրայելական բանակի ներկայացուցիչը:

Իսրայելի պաշտոնյաներն ավելի վաղ նախազգուշացրել էին, որ կարող են հակահարված տալ այն բանից հետո, երբ Իրանը անցած շաբաթավերջին հարյուրավոր հրթիռներ և անօդաչու թռչող սարքեր արձակեց Իսրայելի քաղաքների ուղղությամբ:

ԱՄՆ-ը հասկացրել է, որ չի միանալու Իրանին պատասխան հարվածին, սակայն հինգշաբթի օրը պատժամիջոցներ է սահմանել իրանական անօդաչու թռչող սարքերի արտադրության մեջ ներգրավված մարդկանց և կազմակերպությունների նկատմամբ՝ ակնկալելով զսպել էսկալացիան:

FARS լրատվական գործակալությունը ավելի վաղ հայտնել էր, որ երեք պայթյուն է որոտացել Սպահանի միջազգային օդանավակայանի մերձակայքում գտնվող Շեկարի բանակային ավիաբազայի տարածքում։

Գործակալության տվյալներով՝ Սպահանում հակաօդային պաշտպանության համակարգ է գործարկվել, որը հայտնաբերել է անօդաչու թռչող սարքը։ Պայթյունների հետևանքով կոտրվել են գրասենյակային մի քանի շենքերի ապակիներ։

IRIB հեռարձակողը, հղում անելով «հավաստի աղբյուրներին», հաղորդում է, որ «երկրի մի քանի շրջաններում լսվող բարձր ձայները հակաօդային պաշտպանության համակարգի մի քանի անհայտ մինի անօդաչու թռչող սարքերի դեմ պայքարի համար ակտիվացնելու արդյունք են»։

Սպահանի օդանավակայանը հարում է Խաթամիի ավիաբազային, իսկ Սպահան նահանգում տեղակայված են Իրանի մի քանի միջուկային օբյեկտներ:

Ինչպես հաղորդում է Tasnim գործակալությունը՝ հղում անելով աղբյուրներին, միջուկային ենթակառուցվածքի օբյեկտներում միջադեպեր չեն գրանցվել։

Թեհրանի և այլ քաղաքների վրայով թռիչքները ժամանակավորապես դադարեցվել են։ Մասնավորապես, Իրանի մայրաքաղաքի Իմամ Խոմեյնիի միջազգային օդանավակայանը թռիչքներ չի ընդունել և չի ուղարկել, հաղորդում են տեղական լրատվամիջոցները։

Mehr գործակալությունը պարզաբանել է, որ դադարեցվել են թռիչքները դեպի Թեհրան, Սպահան և Շիրազ, ինչպես նաև դեպի երկրի արևմուտք, հյուսիս-արևմուտք և հարավ-արևմուտք գտնվող օդանավակայաններ։