Պուտինի և Լուկաշենկոյի «լեհական արշավը». ինչպես միշտ, կշահի Էրդողանը

Պուտինին չի հաջողվի փչացնել Ուկրաինայի և Լեհաստանի հարաբերությունները. այսպես է Ուկրաինայի արտաքին գործերի նախարար Դմիտրի Կուլեբան մեկնաբանել Պուտինի վերջին հայտարարությունները, թե իբր Լեհաստանի իշխանությունները ցանկանում են օկուպացնել ուկրաինական տարածքները։ «Կիևի և Վարշավայի միջև սեպ խրել Պուտինի փորձերը նույնքան ապարդյուն են, որքան նրա անհաջող ներխուժումն Ուկրաինա»,- գրել է նա Twitter-ում։

«Ի տարբերություն Ռուսաստանի, Լեհաստանը և Ուկրաինան դասեր են քաղել պատմությունից և միշտ հանդես կգան որպես միասնական ճակատ ընդդեմ ռուսական իմպերիալիզմի և միջազգային իրավունքի նկատմամբ անհարգալից վերաբերմունքի»,- ընդգծել է նախարարը։

Պուտինն ու Լուկաշենկոն անցել են «հատուկ ռազմական գործողության» հաջորդ փուլը՝ հիմա էլ հայտարարելով Արևմտյան Ուկրաինան «փրկելու» մտադրության մասին։

Ուկրաինայի մասնատման և նրանից արևմտյան հատվածի օկուպացման ծրագրերը, որոնք մշակվել են, այդ թվում՝ Վարշավայում, անընդունելի սցենար են։ Այս մասին Ալեքսանդր Լուկաշենկոն հայտարարել է Ստրելնայում Վլադիմիր Պուտինի հետ հանդիպման ժամանակ։

Լուկաշենկոն ասել է նաեւ, որ «վագներցիները սկսել են լարել իրեն»։ «Մենք ուզում ենք գնալ դեպի Արևմուտք: Թույլ տվեք մեզ»: Ասում եմ՝ ինչի՞ն է ձեզ պետք Արևմուտքը։ «Դե, գնացեք էքսկուրսիա Վարշավա, Ժեշով», – պատմեց Լուկաշենկոն:

«Արևմտյան Ուկրաինայի անջատումը, Ուկրաինայի մասնատումը և հողերի փոխանցումը Լեհաստանին անընդունելի են։ Եվ, եթե Ուկրաինայի արեւմտյան բնակչությանը դա անհրաժեշտ լինի, մենք, իհարկե, ամեն կերպ կաջակցենք նրանց»,- ասել է Լուշենկոն, փոխանցում է Belta-ն։

2022 թվականի փետրվարի 24-ին Ռուսաստանը հիմնավորեց իր ներխուժումն Ուկրաինա՝ «Արևելյան Ուկրաինայի ռուսալեզու բնակչությանը» փրկելու մտադրությամբ։ Արդյունքում՝ 2014 թվականին Ղրիմի բռնակցումից հետո, Ռուսաստանը իր կազմում ներառեց Ուկրաինայի ևս չորս մարզ։ Պատերազմը շարունակվում է մեկուկես տարի և աստիճանաբար տեղափոխվում է բուն Ռուսաստանի տարածք։

Փորձագետները նշում են, որ Պուտինի և Լուկաշենկոյի «լեհական արշավը» բլեֆ է, որով նրանք փորձում են խաղադրույքները բարձրացնել գալիք բանակցություններին ընդառաջ։ Բանակցությունների մասին ավելի ու ավելի հաճախ են խոսվում, սակայն մինչ այժմ դրանք չեն կայանում բանակցությունների համար առաջ քաշված պայմանների անհամաըեղելիության պատճառով։ Իսկ «կարմիր գիծը» Ղրիմն է։

Հատկանշական է, որ երկու կողմերն էլ վստահում են միայն մեկ միջնորդի՝ Էրդողանին։ Թուրքիան արդեն հսկայական շահույթներ է ստացել «միջնորդությունից»՝ հացահատիկի գործարք, գազային հանգույց, ատոմակայան, ԱՄՆ-ի հետ հարաբերությունների վերականգնման նշաններ, ԵՄ-ին անդամակցելու գործընթացի ակտիվացում։ Սակայն Թուրքիայի համար գլխավոր «մրցանակը» կարող է լինել Ղրիմը։

Ռուսաստանն ու Ուկրաինան մտադիր չեն միմյանց զիջել Ղրիմը. Բայց նրանք կարող են փոխանցել այն Էրդողանին՝ «ժամանակավոր պրոտեկտորատի» տակ։ Ինչպես 100 տարի առաջ Նախիջեւանը։

Լեհաստանի պաշտպանության նախարարությունը հայտարարել է, որ վերահսկում է իրավիճակը Բելառուսի հետ սահմանին և պատրաստ է տարբեր սցենարների։

Բելառուսն ավելի վաղ հայտնել էր, որ երկիր ժամանած Wagner-ի վարձկանները համատեղ վարժանքներ են անցկացնում Բրեստսկու պոլիգոնում։ Այս փորձադաշտից՝ 40 կմ է մինչև Ուկրաինայի սահման և մոտ 30՝ մինչև Լեհաստանի սահման:

Լուկաշենկոն Պուտինին բերել է Բելառուսի վրա հարձակման նոր քարտեզ. Ուկրաինա Ռուսաստանի ներխուժման նախօրեին Լուկաշենկոն նույնպես ժամանել էր քարտեզով. «Հիմա ես ձեզ ցույց կտամ, թե որտեղից են հարձակվելու Բելառուսի վրա», – նրա այս խոսքերը մեմ են դարձել։