Արցախի Ազգային ժողովի նախագահը հրաժարական է տվել. ինչպես այսքանից հետո չվատանալ

Արցախի Հանրապետության Ազգային ժողովի նախագահ Արթուր Թովմասյանը հրաժարական է տվել։

Ավելի վաղ տեղեկություններ կային, որ Արթուր Թովմասյանն առողջական լուրջ խնդիրներ ունի, իսկ հուլիսի 21-ին հիպերտոնիկ կրիզ է տարել։

Հիշեցնենք, որ հենց հուլիսի 21-ին է տեղի ունեցել Արցախի խորհրդարանի նիստը, որին հնչել են երեք աններելի կիկսեր. խորհրդարանը դիմել է Հայաստանին՝ ռուս խաղաղապահների համար անհապաղ ՄԱԿ-ի մանդատ հայթայթելու պահանջով, ինքը Արթուր Թովմասյանը չգիտես ինչու ասել է, որ հայերն ու ադրբեջանցիները “հազարամյակների ընթացքում» միասին են ապրել, իսկ պատգամավոր Գրիգորյանը սկանդալային ելույթ է ունեցել Հայաստանի ղեկավարության հասցեին վիրավորական հարձակումներով՝ առանց քաղաքական պահանջների։

Մեր տեղեկություններով՝ իշխանության ներկայացուցիչներն ու հանրության անդամները բավականին կոշտ են խոսել Թովմասյանի հետ, որից հետո նա վատացել է։ Հետո խոսակցություններ եղան նրա հրաժարականի մասին։

Այն, որ խորհրդարանի հուլիսի 21-ի հայտարարությունը խորապես սխալ էր, հաստատեց ՌԴ արտգործնախարար Լավրովը, ով Մոսկվայում Միրզոյանի և Բայրամովի հետ եռակողմ հանդիպումից հետո ներկայացրեց «Արցախում կարգավորման» ռուսական բանաձեւը՝ ինտեգրում, “հայերի՝ որպես ազգային փոքրամասնության իրավունքների պաշտպանություն ադրբեջանական օրենսդրության շրջանակներում» և այլն։ Պարզվում է՝ Արցախի խորհրդարանը ՄԱԿ-ի մանդատ էր խնդրել ռուս խաղաղապահների համար, որպեսզի նրանք ապահովեն Արցախի «ինտեգրումը» միջազգային մանդատով։

Ինչպե՞ս կարող եր դրանից հետո չվատանալ։

Ճիշտ է, հուլիսի 27-ին Արցախի խորհրդարանը բոլորովին այլ կոչ ընդունեց՝ դիմելով ՄԱԿ-ի անդամ երկրներին՝ ճանաչել Արցախի անկախությունը «հանուն փրկության»։ Բայց այս կոչում եւս խոսք չկար Լավրովի հայտարարության և նրա «առաջարկների» անընդունելիության մասին։ Չի եղել նաեւ ՄԱԿ-ի խաղաղապահ զորքերի տեղակայման պահանջ։

Արդյո՞ք «թոշակի անցած» Արթուր Թովմասյանը կպատմի, թե ով և ինչպես է ստիպում արցախցի պատգամավորներին Ռուսաստանի շահերից բխող, բայց Արցախի շահերին հակասող հայտարարություններ անել։