Ալիևն ու Պուտինը պայմանավորվում են, հետո Պուտինը կասի Փաշինյանին

«Ես գիտեմ, որ Ադրբեջանը նպատակ ունի ավարտին հասցնել կարգավորման հետ կապված բոլոր ընթացակարգերը, ես դա լավ գիտեմ»,- Բաքվում ասել է Պուտինը Ալիևի հետ բանակցությունների ժամանակ։ Նա հայտարարեց, որ նախատեսում է Նիկոլ Փաշինյանին ասել բանակցությունների արդյունքների մասին։

BBC-ն, մեկնաբանելով Պուտինի այցը Բաքու, հիշեցրել է, որ օգոստոսին Բաքուն և Երևանը խաղաղ համաձայնագրի նախագծից բացառել են Ադրբեջանը և Նախիջևանը կապող տրանսպորտային երթուղու կամ, ինչպես այն Բաքվում անվանում են՝ «Զանգեզուրի միջանցքի» կետը: Այս հարցը հետաձգվել է բանակցությունների հաջորդ փուլում քննարկելու համար։

«Բաքուն և Մոսկվան ցանկանում էին, որ ճանապարհը վերահսկվի Ռուսաստանի կողմից, սակայն Հայաստանը դեմ էր դրան»,- գրում է BBC-ն։

Ավելի վաղ Կրեմլը հայտնել էր, որ Մոսկվան Հարավային Կովկասի կարգավորումը տեսնում է «եռակողմ ձևաչափի» շրջանակներում, այլ կերպ ասած՝ Մոսկվայի մասնակցությամբ և համակարգմամբ։

Մոսկվան և Բաքուն 4 տարուց ավելի տորպեդահարում են ԵԱՀԿ Մինսկի խմբի աշխատանքը և պահանջում են չեղարկել նրա մանդատը։ ԱՄՆ Պետդեպարտամենտը, վերջերս պատասխանելով Մինսկի խմբին վերաբերող հարցին, չպնդեց դրա պահպանումը՝ ասելով, որ համաձայն է աջակցել ցանկացած կարգավորման, եթե այն լինի կողմերի համաձայնությամբ։

Ռուսաստանը պատրաստ է աջակցել Ադրբեջանի եւ Հայաստանի միջեւ խաղաղության համաձայնագրի կնքմանը հասնելուն, մասնակցել ճգնաժամի կարգավորմանն այն մասով, որտեղ դա պահանջված է կողմերի համար, հայտնել է ՌԴ նախագահ Վլադիմիր Պուտինը, տեղեկացրել է «ՌԻԱ Նովոստի»-ն։

«Եթե մենք ինչ-որ բան կարող ենք անել, որպեսզի խաղաղության համաձայնություն կնքվի, գործը հասցվի սահմանազատման, սահմանագծման, ապաշրջափակման… համապատասխան ուղղությունների լոգիստիկայում եւ տնտեսությունում, մենք ուրախ կլինեինք»,- ասել է Պուտինը նեղ կազմով Ադրբեջանի նախագահ Իլհամ Ալիեւի հետ բանակցությունների ընթացքում։

Նա ավելացրել է, որ  Ռուսաստանն էլ է բախվում ճգնաժամերի, «նախ եւ առաջ, իհարկե, ուկրաինական ուղղությամբ», սակայն Ռուսաստանի պատմական ներգրավվածությունը Հարավային Կովկասի իրավիճակին, այդ թվում վերջին մի քանի տարիներին, թելադրում է նրան այդ իրադարձություններին մասնակցության անհրաժեշտությունը, «այն մասով, որտեղ դա պահանջված է կողմերի համար»։