Իրանը չի նշում նախագահական ուղղաթիռի կործանման պատճառը

Իրանում ուղղաթիռի կործանման պատճառը, որը խլել է երկրի նախագահ Իբրահիմ Ռաիսիի, արտաքին գործերի նախարար Հոսեյն Ամիր Աբդոլլահիանի և այլ պաշտոնյաների կյանքերը, գերծանրաբեռնվածությունն է եղել՝  ինքնաթիռում 2 ավելորդ մարդկանց պատճառով։ Այս մասին չորեքշաբթի հայտնել է իրանական Fars գործակալությունը՝ վկայակոչելով հետախուզական ծառայությունների իր աղբյուրներին։

Իրանի գլխավոր շտաբը ի պատասխան հայտարարել է, որ Fars գործակալության աղբյուրների վարկածը չի համապատասխանում իրականությանը։ Թե որն է այս դեպքում երեք ամիս առաջ տեղի ունեցած աղետի իրական պատճառը, իրանցի զինվորականները չեն ասում։

Գործակալությունը հիշեցնում է, որ Գլխավոր շտաբն ինքը դեռ մայիսին երկու զեկույցներում հայտարարել էր, որ ուղղաթիռի բեկորների վրա գնդակների կամ պայթյունի հետքեր չեն հայտնաբերվել, ինչպես նաև տեխնիկայում էլեկտրոնային պատերազմի սարքավորումների ազդեցության հետքեր չեն հայտնաբերվել։

Ինչո՞ւ երեք ամիս անց նախագահական ուղղաթիռի կործանման պատճառների մասին պաշտոնական վարկածներ չկան։

Հիշեցնենք, որ Ռաիսին վերադառնում էր Իրանի Արևելյան Ադրբեջան նահանգից՝ Ադրբեջանի հետ սահմանին, որտեղ Ալիևի հետ մասնակցել է սահմանային Արաքս գետի վրա ամբարտակի շահագործման հանձնման արարողությանը։

Բացի այդ, այդ հատվածներում՝ Արցախի օկուպացված տարածքներում, 2020 թվականի պատերազմից հետո իսրայելական ռազմական ենթակառուցվածքներ են հայտնվել։

Իրանի կողմից աղետի պատճառների մասին ցանկացած հայտարարություն կենթադրի կոնկրետ գործողություններ։ Եվ քանի որ ոչ ոք չի հավատում «գերբեռնվածությանը», սա նշանակում է, որ պատճառները արտաքին են, և կասկածյալներն ու մեղավորները պետք է հայտնի լինեն։ Եվ հետո՝ պատժվեն։

Ըստ ամենայնի, Իրանը դեռ չի կարծում, որ պատրաստ է նման քայլերի։ Թեհրանում էլ գիտեն, որ լռողները ժամանակ են շահում։ Իսկ նրանք, ովքեր սպասում են մեղադրանքների, սկսում են սխալվել։