Ռուսաստանն Արցախին “խորոված” է առաջարկում, ոչ թե ծուխ

ՌԴ ԱԳՆ-ն գիշերը կոշտ հայտարարություններ է տարածել՝ ասելով, որ Արևմուտքի միջնորդությամբ Հայաստանի և Ադրբեջանի միջև «խաղաղության պայմանագրի» «հապճեպ» ստորագրումը կարող է հանգեցնել հակամարտության վերսկսման։ Նշվում է, որ Երևանն ու Բաքուն եռակողմ համաձայնագրերի համար հիմք են ընդունել «տեղում ստեղծված իրավիճակը» եւ եռալողմ պայմանավորվածությունները, և առանց դրանց կատարման չի կարող լինել «խաղաղության պայմանագիր»։

Մի քանի օր առաջ, երբ Մոսկվայում արտգործնախարարների հանդիպումից հետո Սերգեյ Լավրովն ասաց, որ «Ղարաբաղի ժողովրդի իրավունքների պաշտպանությունը որպես ազգային փոքրամասնության տեսնում է Ադրբեջանի օրենսդրության շրջանակներում», և Ռուսաստանը կարող է, բայց հարկ չի համարում բացել Բերձորի միջանցքը, Արցախում կոշտ հայտարարություններ են հնչել Մոսկվայի դեմ։

Նախագահն անընդունելի է անվանել Ռուսաստանի մոտեցումները, պետնախարարը՝ անտանելի Ռուսաստանի դատարկ խոստումները, խորհրդարանի նախագահը, ով ավելի վաղ կոչ էր անում ՄԱԿ-ի մանդատ տրամադրել ռուս խաղաղապահներին, վշտից հրաժարական տվեց։

Օրերս ելույթ ունեցավ Արցախի նախագահին առընթեր հակաճգնաժամային խորհրդի ղեկավարը և հայտարարեց, որ Ռուսաստանն առաջարկում է Ստեփանակերտ-Բաքու հանդիպում Եվլախում, իսկ ԱՄՆ-ն հանդիպում է նախապատրաստում Բրատիսլավայում։ Նա ասել է, որ ԱՄՆ ներկայացուցիչը շուտով կժամանի տարածաշրջան և «մենք կքննարկենք ԱՄՆ առաջարկները», քանի որ ռուսական առաջարկներն անընդունելի են։

Երեկ Երեւանում էր ԱՄՆ պետքարտուղարի ավագ խորհրդական Լուի Բոնոն, որին Հայաստանի արտգործնախարարն ու վարչապետը չընդունեցին, միայն Անվտանգության խորհրդի քարտուղարը։ Հանդիպել է արդյոք նա Ղարաբաղի ներկայացուցիչների հետ, հայտնի չէ։ Բաքվում նրան ընդունել են Բայրամովն ու Ալիևը, որից հետո գիշերը ՌԴ ԱԳՆ-ն սպառնալիքներ է հնչեցրել «հակամարտությունը վերսկսելու» մասին։

Հադրութի քաղաքապետ Վահան Սավադյանը կարծում է, որ Արցախը մերժել է ռուսական ծրագիրը, իսկ Ռուսաստանը փորձում է համոզել Արցախին «ինտեգրվել» Գոլոդոմորով։

Արցախը դեռ հավատո՞ւմ է ռուսական միջնորդությանը։ ՌԴ ԱԳՆ-ի հայտարարության մեջ ասվում է, որ Արեւմուտքի խոստումները պարունակում են «ավելի շատ ծուխ, քան խորոված»: Ռուսաստանի գործողություններում, ըստ երեւույթին, ավելի շատ «խորոված» կա՝ տապակված մարդկային ճակատագրերի վրա։