Նարիշկինի այցից հետո Ալիեւը “մատ թափ տվեց” ԱՄՆ-ի, Ֆրանսիայի եւ Հայաստանի հասցեին

«Ես նաև Հայաստանին եմ նախազգուշացնում՝ այստեղ կանգնած․ դադարեցրեք այդ վտանգավոր խաղերը։ Մի կողմից խոսում են խաղաղությունից, մյուս կողմից՝ զանգվածաբար զինվում։ Ո՞վ է նրանց զենք տալիս՝ Ֆրանսիան ու նրա նման՝ հակաադրբեջանական երկրները։ Ինչո՞ւ են այդ զենքը ձրի տալիս։ Որքան էլ փորձեն, ոչնչի չեն հասնի։ Թող հանգիստ թողնեն Հարավային Կովկասն ու գնան, զբաղվեն իրենց խնդիրներով։ Սա իմ նախազգուշացումն է, և կարծում եմ, նրանք, որ կհետևեն իմ խորհրդին, չեն սխալվի», – նշել է Իլհամ Ալիևը։

«Պաշտոնական Բաքվի վերջին շրջանի հայտարարություններն առնվազն մի շարք կարևոր հարցեր են առաջացնում», – այսօր արձանագրել է Հայաստանի արտգործնախարարության խոսնակը, առանձնացնելով դրանցից երկուսը․ «Արդյո՞ք Ադրբեջանը հրաժարվում է Հայաստանի տարածքային ամբողջականությունը և ինքնիշխանությունն Ալմա-Աթայի հռչակագրի հիման վրա ճանաչելու պայմանավորվածություններից: Եվ երկրորդ՝ արդյոք Ադրբեջանը հրաժարվում է Խաղաղության օրակարգից»:

«Երևանը որևէ հարևանի նկատմամբ ագրեսիվ մտադրություններ չունի, ճանաչում է նրանց բոլորի տարածքային ամբողջականությունը, իր օկուպացված տարածքներն էլ չի պատրաստվում վերադարձնել ռազմական ճանապարհով», – հայտարարել է Հայաստանի ԱԳՆ խոսնակը:

Ալիեւի սպառնալիքները պատահական չեն հնչել Նարիշկինի հետ հանդիպումից հետո՝ Իրանի սահմանին։ Մոսկվան, Բաքուն եւ Անկարան խափանում են Իրան-Արեւմուտք հնարավոր համաձայնությունը եւ ակնհայտորեն նախապատրաստվում Իրանի հնարավոր “անկմանը”։ Չի բացառվում՝ ԱՄՆ-ից Ալիեւին զգուշացրել են հանկարծ չխառնվել գործընթացներին։ Ամերիկյան կոնգրեսմենների նամակը ակնհայտորեն ուղված է Բաքվին ռուս-թուրքական պլանից զսպելուն։ 

Հայաստանի ԱԳՆ-ն պատասխանը տարորինակ է․ եթե Բաքուն պատասխանի, որ հրաժարվում է նախկին պայմանավորվածություններից, ո՞րն է լինելու Հայաստանի քայլը։