Շվեդիայի դեսպան․ Չկար միջազգային դատական համակարգ, որ կարող էր բացել Լաչինի միջանցքը
- 14:55 04.02.2025
Ժողովրդավարության եւ անվտանգության տարածաշրջանային կենտրոնի կողմից այսօր Երեւանում կազմակերպվել է «Ուղիղ երկխոսություն. փախստականների կարիքների հասցեագրումը Հայաստանում» թեմայով համաժողով, որին մասնակցում էին Հայաստանում Շվեդիայի, Մեծ Բրիտանիայի դեսպաններն ու ԵՄ պատվիրակության ղեկավարի տեղակալը, քաղհասարակության ներկայացուցիչներ եւ տեղահանված արցախցիներ։
2023թ. Արցախի հայաթափումից հետո մի շարք միջազգային ծրագրեր մեկնարկեցին արցախցիներին օգնելու համար։
«2023թ-ին տեսնում էինք, որ սեւ ամպեր են կուտակվում Լեռնային Ղարաբաղի վրա։ Մարտահրավերային իրավիճակ էր Լեռնային Ղարաբաղի հետ կապված։ Չկար միջազգային դատական համակարգ, որ կարող էր բացել Լաչինի միջանցքը։ Մենք մեր գնահատականն էինք տալիս, բայց պատրաստ էինք վատագույնին։ Ցավոք վատագույը տեղի ունեցավ՝ ռազմական հարձակումով»,- նշել է Հայաստանում Շվեդիայի թագավորության դեսպան Պատրիկ Սվենսոնը, հույս հայտնելով, որ միջազգային օգնությունները կշարունակվեն՝ արցախցիներին օգնելով լիարժեք ինտեգրվել Հայաստանում։
Լրագրող Սիրանուշ Սարգսյանի կարծիքով ուղիղ երկոսությունն այնքան էլ չի կայանում, որովհետեւ շատ հաճախ տեղահանված ընտանիքների մի մեծ մասը տեղյակ չէ առկա աջակցեւթյան ծրագրերից։
«Շրջափակման 10 ամիսների ընթացքում մենք կատարյան մենության մեջ էինք, նույնիսկ Հայաստանից չկար օգնություն, կարծես մենք գոյություն չունեինք այս աշխարհի համար։ Ծրագիրը հնարավորություն է տվել, որ արցախցիները մասնակցեն եւ ինչ որ բան սովորել։ Մենք իհարկե, շնորհակալ ենք աջակցության համար, սակայն մեծագույն աջակցությունն այս պահին 40+10 ծրագիրն է, որը առաջիկայում դադարեցնելու են,- իր մտահոգությունն է հայտնում Սիրանուշը։
Մարիամ Սարգսյան