Ավելի քան 320 մարդ շարունակում է այցելել Հադրութի ստեղծագործական կենտրոն, այժմ Հայաստանում
- 17:53 12.02.2025
Հադրութի մանկապատանեկան ստեղծագործության կենտրոնը արցախյան այն սակավ կազմակերպություններից է, որը, չնայած բոլոր խոչընդոտներին, շարունակում է իր առաքելությունը բռնի տեղահանության պայմաններում։
«Հադրութի մանկապատանեկան ստեղծագործական կենտրոնը հիմնադրվել է 90-ականների սկզբին։ Ժամանակի ընթացքում մեր մասնաճյուղերը բացվեցին Հադրութի շրջանի բազմաթիվ գյուղերում։ 2020 թվականին 44-օրյա պատերազմի և Հադրութի օկուպացիայի արդյունքում Կենտրոնի անձնակազմը շրջանի ողջ բնակչության հետ միասին լքեց հայրենիքը՝ թողնելով իր ողջ ունեցվածքը։
Հետագայում, հաստատվելով Հայաստանում, սկսեցինք մտածել մեր համայնքը, մշակույթն ու ավանդույթները պահպանելու մասին։ Այսպես, 44-օրյա պատերազմից որոշ ժամանակ անց Արցախի կառավարության և Հայաստանի գործընկերների, այդ թվում՝ Իգիթյանի Ազգային կենտրոնի, Տերյան մշակութային կենտրոնի և այլոց աջակցությամբ, կարողացանք վերսկսել Կենտրոնի աշխատանքը Երևանում։
Հետագայում մեր մասնաճյուղերը բացվեցին Հայաստանի այլ վայրերում, ինչպես նաև Ստեփանակերտում։ Կազմակերպության նպատակն է համախմբել բոլոր արցախցիներին և պահպանել մեր դարավոր ժողովրդի ընդհանրությունը, մշակույթն ու ավանդույթները։
Կենտրոնում գործում են տարբեր խմբակներ՝ նկարչություն, խեցեգործություն, ձեռագործություն, գոբելեն, գորգագործություն, փայտամշակում և այլն։ Խմբակներն անվճար են։
Ինչպես նաև անվճար անցկացվում են տարբեր մասնագիտական դասընթացներ՝ գործվածքի, հագուստի ձևավորման և այլն, որին մասնակցում են ոչ միայն երեխաներն ու երիտասարդները, այլեւ հասուն մարդիկ։ Նրանք սովորում են նոր հմտություններ, որոնք հետագայում հնարավորություն են տալիս աշխատելու համապատասխան մասնագիտությամբ։
Ներկայումս մասնաճյուղեր ունենք Ռանչպար, Մուղնի, Ոստան և այլն գյուղերում։ Ընդհանուր առմամբ Կենտրոն է այցելում շուրջ 320 մարդ Արցախից և Հայաստանից։
Մեր աշակերտները բազմիցս մասնակցել են տարբեր տոնավաճառների ու ցուցահանդեսների՝ ինչպես Հայաստանում, այնպես էլ այլ երկրներում։ Ուսուցչական կազմը բաղկացած է 25 հոգուց, նրանք նույնպես Հադրութի շրջանից են և Արցախի այլ վայրերից։
Մինչև 2023 թվականի սեպտեմբերը մեր Կենտրոնը պետական էր, և աշխատակիցների աշխատավարձերը վճարվում էին Արցախի պետական բյուջեից։ Հիմա, ցավոք սրտի, կենտրոնը գործում է բացառապես հասարակական հիմունքներով»։
Այս մասին Step1.am-ի հետ զրույցում ասաց Հադրութի մանկապատանեկան ստեղծագործական կենտրոնի տնօրեն Իրա Թամրազյանը։
Արսեն Աղաջանյան
