Ռուսաստանի ԶՈւ սպան դատապարտվել է 18 տարվա ազատազրկման՝ Ղարաբաղում խաղաղապահների զոհվելու վերաբերյալ տվյալների արտահոսքի համար
- 08:54 26.06.2025
Ինչպես հայընում է caucasus-chronicle.com-ը, Եկատերինբուրգի Կենտրոնական շրջանային ռազմական դատարանը դատավճիռ է կայացրել պետական դավաճանության գործով. ռուս մայոր Եվգենի Ալակաևը դատապարտվել է 18 տարվա ազատազրկման: Նա առաջին հինգ տարին կանցկացնի բանտում, իսկ մնացածը՝ խիստ ռեժիմի ուղղիչ գաղութում: Ինչպես հաղորդում է The Insider-ը, այս մասին հայտնել է «Մեմորիալ» մարդու իրավունքների կենտրոնը։
Ըստ կազմակերպության՝ Ալակաևը կալանավորվել է ոչ ուշ, քան 2023 թվականի նոյեմբերին, հնարավոր է՝ արդեն հոկտեմբերին: Քրեական գործ հարուցելու հիմք է հանդիսացել 2023 թվականի սեպտեմբերի 20-ին Լեռնային Ղարաբաղում զոհված ռուս խաղաղապահների մասին տեղեկություններ պարունակող փաստաթղթի լուսանկարը: Հետաքննիչների խոսքով՝ մայորը լուսանկարը արել է և մեսենջերի միջոցով ուղարկել իր մորը և Իտալիայում բնակվող իր ծանոթին՝ Ուկրաինայի հունական կաթոլիկ եկեղեցու քահանա Կոնստանտին Միրոնովին:
Մեղադրանքի կողմի պնդմամբ, փաստաթուղթը պարունակում էր գաղտնի տեղեկատվություն հատուկ գործողությունների ընթացքում խաղաղ ժամանակ կորուստների մասին: Ալակաևը, ենթադրաբար, այն ստացել է խարդախության միջոցով՝ պնդելով, որ լուսանկարում է իր վերադասների անունից: Սպան ինքը պնդել է, որ փաստաթուղթը գաղտնի չէ, և լուսանկարը արել է ընկերոջ՝ գնդապետ Թագիր-Մուրոդ Կարաևի հուզական ազդեցության տակ, որը զոհվել էր այդ օրը Լեռնային Ղարաբաղում:
Հետաքննությունը նաև պնդում է, որ Միրոնովի հետ իր նամակագրության մեջ մայորը տեղեկատվություն է փոխանակել Ուկրաինայում ռազմական գործողությունների վերաբերյալ, այդ թվում՝ պետական և ծառայողական գաղտնիք կազմող տվյալներ: Կողմերը քննարկել են ռազմական գործողությունների ընթացքը, կորուստները, ինչպես նաև անձնական կարծիք են հայտնել իշխանությունների գործողությունների վերաբերյալ:
Հիշեցնենք, որ 2023 թվականի սեպտեմբերի 19-ին Ադրբեջանը ռազմական գործողություն սկսեց Լեռնային Ղարաբաղում, որն ավարտվեց տարածաշրջանի լիակատար վերահսկողության տակ վերցնելով և հայ բնակչության զանգվածային արտաքսումով: Հաջորդ օրը հրետակոծության հետևանքով ոչնչացվեց ռուս խաղաղապահներով մեքենա, որի հետևանքով զոհվեցին հինգ զինծառայողներ: Ադրբեջանական կողմը հայտարարեց, որ միջադեպը սխալմունքի արդյունք էր: 2024 թվականի գարնանը ռուսական խաղաղապահ զորակազմը լքեց Ղարաբաղը: Նշռնք նաև, որ ռուսական զորքը իր հետ տարավ նաև զոհված զինվորների պատվին տեղադրված հուշաքարը։