Շուշիի գորգի թանգարան՝ միայն առանց ծագման վայրի նշման

Վերջերս գրել էինք Շուշիի գորգի թանգարանի մասին, որի ցուցանմուշների հիմնական մասը փրկվել և տեղափոխվել է Հայաստան։

44-օրյա պատերազմի ավարտից ի վեր դրանք պահվել են մասնավոր պահեստում, քանի որ պետական ​​իշխանությունները որևէ աջակցություն չեն ցուցաբերել թանգարանի վերաբացման համար:

«Բազմիցս դիմել եմ պատկան մարմիններին՝ ՀՀ կրթության և մշակույթի նախարարությանը՝ թանգարան բացելու համար տարածք տրամադրելու խնդրանքով, բայց նրանք կամ մերժում են ինձ, և բոլորովին զավեշտալի պատճառներով՝ նշելով, որ Շուշիի գորգի թանգարանը եղել է մասնավոր սեփականություն, կամ առաջարկում են այդ ցուցանմուշները ցուցադրել Հայաստանի թանգարաններում՝ չնշելով գորգերի ծագման վայրերը, այսինքն՝ իրենց համար անընդունելի է “Շուշիի գորգի թանգարան” հասկացությունը։ Ես ինքս անձամբ շրջել եմ գյուղերով և գնել այս գորգերը արցախյան ընտանիքներից։ Ցուցանմուշներից յուրաքանչյուրն ունի ծագման կոնկրետ պատմություն: Նույնիսկ գորգի զարդանախշով կարելի է որոշել, թե ում է այն պատկանում և որքանով է հին։ Ինձ զարմացնում է այն փաստը, որ կրթության նախարարության պաշտոնյաները կա՛մ չգիտեն Հայաստանի պատմությունը, կա՛մ միտումնավոր ջնջում են այն՝ ձերբազատվելով ժողովրդի մշակութային և պատմական ժառանգությունից»,- step1․am-ին տված հարցազրույցում ասել է թանգարանի տնօրեն Վարդան Ասծատրյանը։

Նա ներկայումս փնտրում է գորգերը պահելու նոր վայր, քանի որ նրան խնդրել են հեռացնել գորգերը նախկին պահեստի վայրից:

Արսեն Աղաջանյան