Իրանը Թուրքիային մեղադրել է անձրեւային ամպերը գողանալու մեջ

Հավաստիացումներն այն մասին, թե Թուրքիան, իբր, գողանում է Իրանի անձրեւային ամպերը, անապացուցելի տեսություն են, այս կամ այն երկրում երաշտի պատճառը գլոբալ ջերմացումն է՝ «ՌԻԱ Նովոստի»-ին հայտնել է օդերեւութաբան, Ստամբուլի «Այդըն» համալսարանի պրոֆեսոր Գյուվեն Օզդեմիրը։

Forbes ամսագիրը ավելի վաղ տեղեկացրել էր, որ Իրանի իշխանությունները ստեղծել են երկրի հյուսիսում անձրեւային ամպերի անհետացման հետ կապված իրավիճակի հետաքննության հանձնաժողով, իսկ հանրահայտ տեսությունը վկայում է այն մասին, թե Թուրքիան, իբր, «գողանում» է ամպերը։ Որպես ապացույց ներկայացվում են Թուրքիայի արեւելքի լուսանկարները, որտեղ լեռները ծածկված են ձյունով եւ մշտապես անձրեւներ են գալիս, իսկ հարեւան Իրանում՝ ոչ մի կաթիլ։ Պարբերականը նշել է, որ նման մեղադրանքներ հնչում են ոչ առաջին անգամ. օրինակ՝ 2018թ. Իսլամական հեղափոխության պահապանների կորպուսի (ԻՀՊԿ, Իրանի ԶՈւ էլիտար ստորաբաժանումներ) ներկայացուցիչը պնդում էր, որ Իսրայելը եւ ԱՄԷ-ն փորձում են ազդել Իրանի կլիմայի վրա։

«Անձրեւային ամպերը» գողանալու գաղափարը կամ անգամ նման բանի մասին մտածելու փորձը հիմքեր եւ ապացույցներ չունեցող տեսություն է, որը միտումնավոր կերպով մոլորության մեջ է գցում»,- մեկնաբանել է Օզդեմիրը հոդվածը։

Նա հիշեցրել է, որ, օրինակ, 2023թ. Թուրքիան մի քանի ամիս շոգի եւ երաշտի տիրապետության տակ էր, այդ նույն Ստամբուլում տեղումներ չկային, ջրի պաշարները ջրամբարներում նվազել էին՝ հասնելով կրիտիկական նիշի։ «Միեւնույն ժամանակ, մեզանից արեւմուտք՝ Հունաստանում, Բուլղարիայում, Ռումինիայում եւ հարեւան այլ երկրներում հորդ անձրեւներ էին, բայց դրանք մեզ չէին հասնում։ Հաշվի առնելով Թուրքիայի դիրքը՝ երկարատեւ եւ կարճատեւ ծրագրերում հնարավոր են օդերեւութաբանական ծայրահեղ ցուցանիշներ»,- նշել է գիտնականը։