Հաճախորդները շատ են, բոլորին սպասարկելու ժամանակ չունենք

«Առավոտյան ժամը 6-ին ոտքով գալիս եմ աշխատանքի, որպեսզի հասցնեմ աշխատել մինչև հոսանքի անջատումը», ասում է վարսահարդար Անահիտը։

Արցախի շրջափակումը իր բացասական ազդեցությունը ունեցավ նաև գեղեցկյության ոլորտի վրա։ Անհրաժեշտ նյութերի պակասի և օրական 6 ժամով լույսերի անջատումների պայմաններում ոլորտի մասնագետները հարմարվում են իրավիճակին ինչպես կարող են։

Անահիտը աշխատում է որպես վարդահարդար Ստեփանակերտի ամենահայտնի գեղեցկության սրահներից մեկում։ Ասում է, որ հաճախորդների պայաս չեն զգում, բայց գործի բնույթը լիովին փոխվել է։ Եթե նախկինում գեղեցկության սրահում հիմնականում կատարում էին մեծ պատվերներ, հարսանեկան սանրվածքներ ու դիմահարդարում, հիմա հարսանիքների պակասելու պատճառով ստիպված անցել են սովորական գործերի, ինչը նաև բացասական է ազդում ստացվող գումարի վրա։

«Գումարն էլ մի կողմ, չգիտենք լույս ունենալու 4 ժամում ինչ հասցնենք անել։ Հաճախորդները շատ են, բոլորին սպասարկելու ժամանակ չունենք»։

Մթերքի և առաջին անհրաժեշտության ապրանքների պակասի հետ նաև զգացվում է գեղեցկության ոլորտի օգտագործվող նյութերի պակասը։ «Ինչպես սկզբում, այնպես էլ հիմա ամեն ինչ շատ դժվար է գտնվում, իսկ եթե գտնում ես, շատ թանկ է», ասում է Անահիտը։ Սակայն պարծենում է, որ չնայած գնաճին, իրենց մատուցած ծառայությունների արժեքը չի փոխվել։