Ումից է Արցախի խորհրդարանը «երաշխիքներ» պահանջում. արցախյան աթոռն առանց էդ էլ երկու ոտք ունի

Արցախի խորհրդարանը հայտարարություն է ընդունել, որում, ըստ էության, ասվում է, որ Բաքվից հրետակոծությունն ու էսկալացիան ուղղակիորեն կապված են Վաշինգտոնի բանակցությունների հետ։ Այսինքն՝ Բաքուն չի ցանկանում բանակցություններ վարել Վաշինգտոնում եւ ուզում է վերադառնալ ռուսական «եռակողմ» ձեւաչափին, ինչի համար էլ կրակում է։

«Վաշինգտոնում հայկական պատվիրակությունն անհապաղ դադարեցնել ընթացող բանակցությունները, մինչև Արցախի հետ շփման գծում և Հայաստանի սահմանին ամբողջական հրադադարի հաստատելը։ Եվ դրա պահպանման փաստաթղթային երաշխիքների տրամադրումը»,- ասված է հայտարարության մեջ։

Ո՞վ պետք է փաստաթղթային երաշխիքներ տրամադրի: Ռուսական խաղաղապահ զորքե՞րը։ Արցախը պատրաստվում է ինչ-որ «երաշխիքներ» ստորագրել Բաքվի և Մոսկվայի հետ, իսկ Վաշինգտոնի բանակցությունները դրան խանգարո՞ւմ են։

«Մենք պետք է ոչ թե կոչ անենք Հայաստանին դադարեցնել բանակցությունները, այլ Ռուսաստանին՝ որ կատարի իր պարտավորությունները կամ անկեղծորեն ընդունի իր անվճարունակությունը, իսկ Հայաստանը բանակցությունների ընթացքում պետք է բարձրացնի միջազգային ուժեր ներգրավելու հարցը, քանի որ Կրեմլի անկարողությունը պատասխանատվություն կրել ստորագրած հայտարարության համար ակնհայտ է։ Կարծես թե ԱԺ պատգամավորական կուսակցությունները կա՛մ կույր են, կա՛մ շիլ, միջազգային հարաբերություններից ոչ մի բան չեն հասկանում։ Արցախի համար գլխավոր սպառնալիքը՝ Արցախի Ազգային ժողովն է»,- գրում է արցախցի գործիչ Արթուր Օսիպյանը։

Միևնույն ժամանակ, խորհրդարանը դիմում է ՄԱԿ-ի Անվտանգության խորհրդին, ԵԱՀԿ Մինսկի խմբի համանախագահող երկրների ղեկավարներին՝ կոչ անելով «Ադրբեջանի դեմ պատժամիջոցներ կիրառել, զսպել նրա ագրեսիվ ոտնձգությունները» (ոչ թե խաղաղապահներ ուղարկել)։ «Ռուսաստանի Դաշնության խաղաղապահ առաքելության շրջանակներում ավելի կոշտ միջոցներ կիրառեք Ադրբեջանի անմարդկային, ցեղասպան գործողությունները կասեցնելու համար»,- ասվում է խորհրդարանի հայտարարության մեջ։

Ի՞նչ ասես։ Արցախյան աթոռակը առանց դրա էլ ընդամենը երկու ոտք ունի, եւ եթե մեկը ջարդես, ապա …