Շրջափակումն Աննային չի խանգարում
- 23:25 30.06.2023
Թողնելով Երևանի հարմարավետ կյանքը, ծննդով Շուշեցի Աննան որոշեց տեղափոխվել Արցախ և իր ներդրումը ունենալ Արցախի զարգացման մեջ։
Աննան 24 տարեկան է, մասնագիտությամբ ծրագրավորող, ունի 2 տարվա «mobile developer»-ի փորձ։ Աննան առցանց աշխատում է Իսպանական BeNext կազմակերպությունում, որը հիմնականում տալիս է առցանց աշխատելու հնարավորություններ։
«Աշխատանքը կայանում է նրանում, որ ստանում ենք առաջադրանք, թիմով միանում, և աշխատանքը անում ենք հենց հաճախորդի հետ։ Ներկայում զբաղված եմ ուղևորափոխադրումներ իրականացնող ամերիկյան կազմակերպության կայքի ստեղծման վրա»,- ասում է Աննան։
Աննայի առաջին աշխատանքը ծրագրավորման ոլորտում offline էր, որտեղ նա աշխատել էր մոտ 1.5 տարի, բայց դուրս էր եկել աշխատանքից հենց Արցախ տեղափոխվելու պատճառով։
«Արցախում առցանց աշխատելու միակ դժվարությունը՝ լույսերի անջատումներն են, սակայն ունենալով 4G և «notebook», այդ ամենին շատ չես ուշադրություն դարձնում, մենակ շատ հնարավոր է, որ ինչ-որ կարևոր զանգի ժամանակ ամբողջ քաղաքի համացանցը անջատվի, և չկարողանաս էլ միանալ զանգին»,- ասում է Աննան։
Freelance տարբերակով աշխատանքի դրական կողմերից մեկն էլ հենց այն է, որ կարևոր է կատարած աշխատանքի որակը, ոչ թե աշխատանքի կամ համակարգչի դիմաց նստելու ժամերը։
Առաջինը, ինչ արել էր Աննան Արցախ տեղափոխվելուց հետո, դա տեղի IT շուկան ուսումնասիրելն էր, ինչը նրան հիասթափեցրեց։
«Կարող է շատ վատ հնչել, բայց տեսնելով առաջընթացը և այն տեմպը, որով զարգանում է IT ոլորտը Երևանում, մենք դեռ աճելու տեղ շատ-շատ ունենք․ համ զարգացման տեմպն է դանդաղ, համ շատ ենք հետ մնացել»,- ասում է Աննան։