Նոր Ղազանչի․ շրջափակման մեջ՝ գնդակոծության տակ
- 13:18 03.07.2023
Արցախի Մարտակերտի շրջանի Նոր Ղազանչի համայնքը 2020 թվականի 44-րդ պատերազմից հետո դարձել է սահմանամերձ համայնք, գտնվում է շփման գծին մոտ և հստակ տեսանելի է ադրբեջանական մարտական դիրքերից։
Համայնքի ղեկավար Ռուսլան Առուստամյանի խոսքով՝ գյուղը պարբերաբար գնդակոծվում է։ Այս տարի վարելահողերի կեսից ավելին մնացել է անմշակ։ Պատերազմից հետո համայնքին մնացել է 101 հա վարելահող։
Նաև շփման գծին մոտ լինելու պատճառով գյուղը դադարել է լայնածավալ անասնապահությամբ զբաղվել՝ ընտանի խոշոր եղջերավոր անասունները արոտավայրերով անցնում են Ադրբեջանի կողմից վերահսկվող տարածք, և այն վերադարձնելն անհնար է։ Ուստի գյուղում հիմնականում զբաղվում են բանջարանոցներով, հավերով, խոզաբուծությամբ։
Խոսելով գնդակոծության մասին՝ համայնքի ղեկավարը նշել է, որ հունիսի 28-ի գիշերը ադրբեջանական կողմը կիրառել է հրետանի և անօդաչու թռչող սարքեր, և թեև հարվածները գյուղի մոտ են եղել, կանանց և երեխաներին պատսպարել են, իսկ մնացածը մնացել են գյուղի տարածքում, մինչև հրետակոծության ավարտը։
Հատկապես ծանր է իրավիճակը սահմանամերձ համայնքների բնակչության համար։ Մի կողմից ադրբեջանական կողմից պարբերաբար խախտվում են հրադադարի ռեժիմը, իսկ մյուս կողմից՝ շրջափակում, սննդի, վառելիքի, դեղորայքի պակաս։ Այս ամենին ինչ-որ կերպ պետք է վերջ դրվի՝ մարդիկ խաղաղ կյանք են ուզում իրենց տանը, իրենց համայնքում։
