Հասարակական տրանսպորտի գործունեությունը Արցախում խիստ կսահմանափակվի

Վառելիքի սղության պատճառով Արցախի կառավարությունը որոշել է էապես կրճատել համայնքների և Ստեփանակերտի ավտոբուսային երթուղիները։

Կառավարությունը նշել է, որ Ադրբեջանի կողմից Արցախի ամբողջական շրջափակման պատճառով հանրապետությունում վառելիքի սուր պակաս կա, ուստի գործում է խնայողության ռեժիմ։ Առողջապահության նախարարությանը սահմանափակ քանակությամբ վառելիքի պաշարներ կտրամադրվեն “շտապ օգնության” մեքենաների համար, վառելիք կտրամադրվի նաեւ մարդատար ավտոբուսների և արտակարգ իրավիճակների մեքենաների համար։

Արցախի տարածքային կառավարման և ենթակառուցվածքների նախարարությունը տեղեկացնում է, որ, հաշվի առնելով վառելիքի սուր պակասը, որոշվել է էապես կրճատել ներհանրապետական ​​հասարակական տրանսպորտի շարժը։ Հուլիսի 10-ից մայրաքաղաքից համայնքներ ավտոբուսներով երթուղիները մի քանի անգամ կրճատվել են։

Ստեփանակերտի քաղաքապետարանը տեղեկացրել է, որ հուլիսի 8-ից հասարակական տրանսպորտը կաշխատի միայն աշխատանքային օրերին։ Այսինքն՝ շաբաթ և կիրակի օրերին Ստեփանակերտում ուղեւորափոխադրումներ չեն լինի։ Աշխատանքային օրերին մայրաքաղաքի հասարակական տրանսպորտը կաշխատի առավոտյան ժամը 07:00-ից 10:00-ն, ցերեկը՝ 12:00-15:00-ն և երեկոյան՝ 17:00-ից 20:00-ն: