Սննդի բացակայությունը ստիպում է փակել Արցախի բոլոր մանկապարտեզները
- 17:53 10.07.2023
Նախադպրոցական հաստատություններում երեխաներին հատկացվող սնունդը կհերիքի մեկ շաբաթ։
«Եթե տոտալ շրջափակումը ձգձգվի, և Քաշաթաղի (Լաչին) միջանցքը չբացվի, ապա բոլոր մանկապարտեզները ստիպված կլինեն փակել, քանի որ երեխաներին կերակրելու ոչինչ չի լինի։ Մանկապարտեզներին հազիվ մեկ շաբաթվա սնունդ է մնացել»,- նշել են Արցախի կառավարությունից։
Արցախի կրթության, մշակույթի և սպորտի նախարարության նախադպրոցական հիմնախնդիրների վարչությունից հայտնեցին, որ «պատերազմից հետո Արցախում գործում է 52 մանկապարտեզ, որից 10-ը՝ Ստեփանակերտում»։
«Կառավարության կողմից քննարկվել է գյուղական համայնքներում մանկապարտեզների կառուցման ծրագիրը։ Բայց շրջափակումը կանխեց այս բոլոր ծրագրերը։ Վերջին վեց ամիսների ընթացքում Արցախում սկսել է գործել Մարտունու շրջանի մեկ նոր մանկապարտեզ։ Սակայն մի քանի օր աշխատելուց հետո սննդամթերքի և վառելիքի սղության պատճառով ստիպված փակվել է»,- նշել են վարչությունից։