Լրագրող Հայկ Ղազարյանը հրաժարվել է ներողություն խնդրել, քանի որ ոչ մեկին չի վիրավորել

Փաստաբան Ռոման Երիցյանը հուլիսի 9-ին բողոքի ակցիա է անցկացրել Արցախի դատախազության մոտ՝ իր պաշտպանյալի հետ հանդիպում թույլ չտալու պատճառով։ Ակցիային մասնակցել են նաև մեղադրյալի հարազատները։ Ոստիկանները մոտեցել են, ծեծկռտուք է եղել, փաստաբանը վնասվածքներ  է ստացել։

ՍիվիլՆեթի լրագրող Հայկ Ղազարյանը լուսաբանել է ակցիան և պատրաստել ռեպորտաժ։ Այնուհետեւ իրավապահները խլել են Հայկի հեռախոսը, ջնջել բոլոր ձայնագրությունները եւ վերադարձրել հեռախոսը։

Ըստ Հայկ Ղազարյանի՝ Վ.Սարգսյան փողոցում ինչ-որ մարդիկ հարձակվել են իր վրա, ցանկացել են առեւանգել եւ մեքենա նստեցնել, նա պնդում է, որ այդ ամենը կապված է իր մասնագիտական ​​գործունեության և կոնկրետ այս հաղորդման հետ։

Մեր աղբյուրի փոխանցմամբ՝ դիմակավորված անձինք ներխուժել են Ռոման Երիցյանի աշխատասենյակ, ջարդել տեխնիկան, փչացրել փաստաթղթեր։

Step1.am-ի թղթակցի հետ զրույցում Հայկ Ղազարյանն ասաց, որ Վազգեն Սարգսյան փողոցում իր վրա հարձակվել են, փորձել ուժով մեքենա նստեցնել ու տանել։ «ՆԳ նախարարի թիմից են, սկսեցի բղավել, մարդիկ հավաքվեցին, նրանք հասկացան, որ չեն կարող ուժով մեքենա նստեցնել, հարվածեցին ու գնացին»,- պատմեց Հայկը։

«Ինձ՝ որպես լրագրողի, փորձում էին վախեցնել, քանի որ ես քննադատում էի նրանց աշխատանքը, փորձում էին ինձ ներկայացնել որպես կողմնակալ կողմ, թեև ես միայն իմ գործն էի անում՝ ուղիղ եթերում լուսաբանելով ակցիան։ Ինձ սկսեցին կանչել տարբեր մարմիններ, պահանջեցին ներողություն խնդրել, ես հրաժարվեցի, քանի որ ոչ մեկին չեմ վիրավորել։ Ես հայտարարություն եմ արել, օմբուդսմենը նույնպես հայտարարություն է արել, բայց ոչինչ չի օգնել»,- ասաց Հայկը։