“Մտնում ենք օդանավակայան, վերցնում մեր վերահսկողության տակ, ռուսների մատակարարումը դադարեցնում”

«Մեր ծրագիրն է այստեղ հնարավորինս շատ մարդ հավաքել, որից հետո երթով շարժվել դեպի Հաքարի կամուրջ։ Դրա համար անհրաժեշտ են վառելիք և անվտանգության երաշխիքներ, և այս երկու հարցերով էլ մենք կդիմենք ռուս խաղաղապահներին»,- ասաց ակտիվիստ Արթուր Օսիպյանը։

Հիշեցնենք, որ այսօր Ստեփանակերտում տեղի է ունեցել Միջանցքի ապաշրջափակման ժողովրդական շարժման երթ, որին միացել են հարյուրավոր մարդիկ։ Շարժման անդամները Արցախի պետնախարարի հետ այժմ նախագահականում քննարկում են իրենց պահանջները։ Խոսքը, մասնավորապես, վառելիքի և ավտոբուսների տրամադրման մասին է, որոնցով մարզերից ցանկացողները կարող են միանալ վաղվա ակցիային։

“Մենք ուզում ենք 10 հազար հոգով գնանք Մեծ Շեն, եւ ռուսները պարտավոր են ապահովել մեր անվտանգությունը: Եթե հանկարծ ռուսը դա չանի, ի՞նչ ենք անելու: Դրա պատասխանն էլ կա, մտնում ենք օդանավակայան, թուրքերին էնտեղից քշում ենք, օդանավակայանը վերցնում մեր վերահսկողության տակ, ռուսների մատակարարումը դադարեցնում: Եթե մենք մատակարարում չունենք, ուրեմն իրենք էլ չունեն: Էդ օդանավակայանում մենակ թուրքեր կան եւ ռուսներին ստուգում են: Ուրեմն մեր օդանավակայանում թուրքերը ռուսին ստուգում են, մենք չենք կարո՞ղ ռուսին ստուգել:

Իմիջիայլոց, ռուս խաղաղապահների նկատմամբ մեր վերաբերմունքը ադեկվատ ու կոռեկտ պետք է լինի, առանց ավելորդ զրույցների: Մենք խոսելու ենք իրավական հարցերի շուջ եւ հարցերը կոնկրետ ենք դնելու: Ռուսները պարտականություններ ունեն ըստ նոյեմբերի 9-ի հայտարարության եւ խոսելու ենք դրա շրջանակներում: Եթե իրենք չեն ապահովում մեր անվտանգությունը, մենք իրենց մատակարարումը դադարեցնում ենք: Ոնց մենք, այնպես էլ իրենք: Ինչպես ասում են՝ մեկ օրից կսովածանան, մեկ շաբաթից կկարոտեն, մեկ ամսից կխելոքանան:

Եթե ղարաբաղցիք տասնյակ հազարով գնան կամրջին կանգնեն, Երեւանից էլ են գալու: Բայց մինչեւ մենք այստեղից չսկսենք, հայ ազգը ոտքի չի կանգնելու: Մենք պետք է այստեղ ոտքի կանգնենք, գնանք այնտեղ, դրանից հետո 30 հազար ղարաբաղցիք էլ են գալու, երեք միլիոնն էլ է գալու, ամբողջ աշխարհի հայերը ոտքի են կանգնելու ու այդ դեպքում մենք 10 միլիոնով թուրքին ճզմելու ենք: Հիմա գնում ենք նախագահականի մոտ, եթե դրական պատասխան չեն տալիս, կորոշենք, թե ոնց ենք վարվում», ասաց Արթուր Օսիպյանը: