Միջանցքի ապաշրջափակման շտաբը իշխանություններին հորդորել է դադարեցնել ստրկամիտ քաղաքականությունը
- 13:07 25.07.2023
Ստեփանակերտում այսօր կայանալիք հանրահավաքի նախօրեին Միջանցքի ապաշրջափակման համաժողովրդական շարժման շտաբը կոչ է անում իր համակիրներին հավաքվել «վրանում»՝ քննարկելու եւ վերջ դնելու «իշխանությունների անլուրջ խաղերին»։
Շարժման համակիր, Արցախի հեղափոխական կուսակցության նախագահ Արթուր Օսիպյանը կոչ է արել «իրավիճակի հանդեպ ոչ անտարբեր հայրենակիցներին» հավաքվել Վազգեն Սարգսյան 25 հասցեում գտնվող վրանի մոտ՝ հանրահավաքից կես ժամ առաջ՝ ժամը 19.30-ին։
«Մի երկու կարևոր հարց կա, որոնք պետք է քննարկվեն մինչև հանրահավաքը։ Նախ՝ տեսնում ենք, որ իշխանությունների հայտարարությունները պետական այրերի լուրջ գործողությունների նման չեն։ Նրանց կոչերը ոչ մի լավ բանի չեն բերի։ Ուստի հավաքվում ենք, քննարկում մեր հետագա անելիքները, որպեսզի իշխանություն կոչվածները չշարունակեն ստրկամիտ քաղաքականությունը, որը մեզ ոչ մի լավ բանի չի տանի»,- ֆեյսբուքյան իր էջի ուղիղ եթերում ասել է Արթուր Օսիպյանը։