Lragir. Մոսկվան ու Բաքուն սադրանք են պատրաստում Բերձորի միջանցքում
- 23:32 25.07.2023
Լեռնային Ղարաբաղի Լաչինի միջանցքում ռուս խաղաղապահների պատասխանատվության գոտում արձանագրվել է հրադադարի ռեժիմի խախտում, տուժածներ չկան։ Ռուսական խաղաղապահ կոնտինգենտի հրամանատարությունը ադրբեջանական և հայկական կողմերի հետ հետաքննություն է անցկացնում այս փաստի առնչությամբ, հայտնում է ՌԴ ՊՆ-ն, տեղեկացնում է ՌԻԱ Նովոստին։
Ով է խախտել, որտեղ, երբ՝ ՌԴ ՊՆ-ն չի հայտնում։ Միջանցքը եւ «հարակից» ճանապարհները ռուսական զորակազմի օպերատիվ միջամտությամբ վաղուց հանձնվել են Բաքվի լիակատար վերահսկողությանը եւ արգելափակվել, միջանցքում անցակետ տեղադրելով։ Ռուսական զորակազմը միջանցքի արտատարածքային կարգավիճակի վերացման եւ այն Բաքվի վերահսկողությանը հանձնելու երաշխավորն է։
Այսօր ՌԴ ԱԳ նախարար Լավրովը փաստացի հաստատել է այս հանգամանքը, նշելով, որ «ՌԴ խաղաղապահների հնարավորությունները թույլ են տալիս լուծել հումանիտար խնդիրները, սակայն առանց կողմերի համաձայնության դա դժվար է»։ Հիշեցնենք, որ ըստ նոյեմբերի 9-ի թղթի՝ միջանցքը ռուսների բացառիկ վերահսկողության գոտին է, որտեղ ոչ մի անցակետ, ոչ մի ոչ ռուս զինվորական չպետք է լինի։ Ռուսների արդարացումներն ավելի ու ավելի ողորմելի են հնչում, այդ թվում՝ հղումը կողմերի համաձայնությանը։
Այսօր Բերձորի միջանցքի վերաբերյալ հայտարարություն է տարածել նաեւ Բաքվի սահմանապահ ծառայությունը, ըստ որի՝ իբր հայկական կողմից «սադրանք» է պատրաստվում անցակետի մոտ տրանսպորտային միջոցների կուտակումների տեսքով։ Նշվում է, որ դրա հետեւանքների պատասխանատվությունը կրելու է հայկական կողմը։
Մոսկվան ու Բաքուն այսպիսով պատրվակ են ստեղծում միջանցքը արգելափակված պահելու եւ Արցախի պաշարումը շարունակելու համար։