Արցախի խորհրդարանի վաղվա նիստը վճռորոշ է լինելու
- 13:24 26.07.2023
Վաղը Արցախի խորհրդարանը արտահերթ նիստ կգումարի։ Լավրովի երեկվա բացահայտումներից հետո Արցախի խորհրդարանը պետք է որոշի՝ Արցախի իշխանությունները համաձա՞յն են Լավրովի պլանին, թե՞ մերժում են այն։
Ամեն ինչ շատ հսրակ է․ եթե համաձայնեն, ապա նույն նիստին Արցախի խորհրդարանը պետք է հայտարարի իր ինքնալուծարման, բանակի լուծարման և Լեռնային Ղարաբաղի Հանրապետության վերացման մասին։ Որովհետև Լավրովի առաջարկածը Արցախի համար որևէ կարգավիճակ չի ենթադրում։
Եթե Արցախի խորհրդարանը համաձայն չէ, ապա Սերգեյ Լավրովին պետք է պաշտոնապես ուղարկի այնտեղ, որտեղ նրան ուղարկել են Բաքվում 2013թ.։
Հիշեցնենք, որ Լավրովը երեկ ասել էր, որ «ամենազգայուն հարցը Լեռնային Ղարաբաղի հայերի իրավունքների և անվտանգության երաշխիքն է Ադրբեջանի տարածքային ամբողջականության ապահովման համատեքստում՝ նախկին խորհրդային հանրապետությունների ղեկավարների կողմից 1991թ Ալմա Աթայում ստորագրված հռչակագրին համապատասխան»։
«Հայկական կողմը հասկանում է, որ անհրաժեշտ է համոզել Լեռնային Ղարաբաղի հայերին որքան հնարավոր է շուտ հանդիպել Ադրբեջանի ներկայացուցիչների հետ՝ համաձայնեցնելու Ադրբեջանի օրենսդրությունից և միջազգային պարտավորություններից բխող իրավունքները, այդ թվում՝ ազգային փոքրամասնությունների հետ կապված»,- ասել է Լավրովը։
Իրադարձությունների հետագա ընթացքը կախված է լինելու Արցախի խորհրդարանի վաղվա որոշումից՝ կա՛մ Լավրովի ծրագրի ընդունում, կա՛մ միջազգային կազմակերպություններին դիմում՝ միջազգային լեգիտիմ ատյաններում քաղաքական կարգավորում սկսելու պահանջով։
Այն, որ Լավրովը բացահայտել է բոլոր հաղթաթուղթերը, հուշում է, որ նրանք այլեւս փաստարկներ չունեն։ Երկար փնտրտուքներից հետո գտնվեց միակ փաստաթուղթը, որով Արցախը «ճանաչվում» է Ադրբեջանի կազմում՝ Ալմա-Աթայի հռչակագիրը, որը ոչ ոք չէր հիշում 30 տարի։ Այլևս ոչինչ չկա։ Արցախի խորհրդարանը Ալմա Աթայի և այլ հռչակագրերի ստորագրող չէ. Արցախն ազատ է իր Սահմանադրության շրջանակներում որոշումներ կայացնելու հարցում։