Ստեփանակերտի Կարմիր Խաչի գրասենյակի մոտ տեղի է ունեցել ակցիա՝ առևանգված հիվանդ արցախցուն վերադարձնելու պահանջով (վիդեո)
- 21:49 29.07.2023
Այն բանից հետո, երբ հայտնի դարձավ, որ ադրբեջանական սահմանապահ ծառայություններն առևանգել են ԿԽՄԿ-ի միջոցով Արցախից Հայաստան տեղափոխվող հիվանդներից մեկին, իսկ հետո Բաքվի գլխավոր դատախազությունը նրան մեղադրանք է առաջադրել մարտական գործողություններին մասնակցելու համար, ԿԽՄԿ Ստեփանակերտի գրասենյակի մոտ տեղի է ունեցել ինքնաբուխ բողոքի ցույց։
Մոտ 500-600 մարդ պետնախարար Գուրգեն Ներսիսյանի, օմբուդսմեն Գեղամ Ստեփանյանի հետ միասին եկել էին գրասենյակ՝ պահանջելով վերադարձնել առևանգված հիվանդ տղամարդուն՝ Վագիֆ Խաչատրյանին։
Պետնախարարը Խաչատրյանի հարազատների հետ հանդիպում է ունեցել գրասենյակի ղեկավարության հետ, որից հետո գրասենյակի ղեկավարը դուրս է եկել ներկաների մոտ և ասել, որ բանակցությունները շարունակվում են, և իրենք կօգտագործեն բոլոր միջազգային մեխանիզմները՝ խնդիրը լուծելու համար։
Ճանապարհին նրան ուղեկցող Խաչատրյանի դուստրն ասաց, որ նրան ուղղակի տարել են՝ առանց որևէ բացատրության։ Խաչատրյանի եղբայրը պահանջել է վերադարձնել Վագիֆին։ Եթե Կարմիր Խաչը ստանձնել է նրան տանելու պատասխանատվությունը, ապա նա էլ պետք է վերադարձնի Խաչատրյանին։
Խաչատրյանի դուստրը այնուհետեւ պետնախարարի հետ գնացել է ռուս խաղաղապահների հրամանատարության մոտ, իսկ մնացածները գնացել են Վերածննդի հրապարակ՝ իրենց բողոքն հայտնելու նախագահ Արայիկ Հարությունյանին։
Հանրահավաքի մասնակիցները նշել են, որ եթե այս պատմությանը լուծում չգտնվի, ապա նույն ճակատագիրն է սպասվում արցախցի բոլոր բնակիչներին՝ կանանց և տղամարդկանց։
