Ֆրանսիացի պատգամավորներն ու Արցախն առաջարկում են կոշտ քայլեր. ձեւաչափը փոխվել է

Մի քանի տասնյակ ֆրանսիացի պատգամավորներ կոչով դիմել են Ֆրանսիայի նախագահ Մակրոնին։

«Գործադիր իշխանությունը հստակ մանդատ ունի գործելու 2022 թվականի նոյեմբերի 15-ին Սենատի և 2022 թվականի նոյեմբերի 30-ի Ազգային ժողովի կողմից ընդունված բանաձևերի համաձայն, ինչը նրան ազատություն է տալիս Բաքվի ռեժիմի դեմ տնտեսական պատժամիջոցներ և քաղաքականություն սկսելու համար և հայերին վճռական գործառնական աջակցություն ցուցաբերելու հնարավորություն:

Ներկայիս իրադարձությունները ցույց են տալիս, որ Ֆրանսիան գիտի, ինչպես պատժել ում ուզում է, երբ ուզում է, նույնիսկ հզոր Ռուսաստանի պարագայում։ …Ադրբեջանն ինքը արդարացնում է Ֆրանսիայի դերն ու գործունեությունը տարածաշրջանում, հաստատում է մեր երկրի գործողությունների օրինականությունը, և բռնի ուժով հաստատված օկուպացիան ոչ մի դեպքում չի կարող գոյություն ունենալ»,- ասվում է հայտարարության մեջ։

Իր հերթին, Արցախի նախագահ Արայիկ Հարությունյանն այսօր հանդես է եկել հայտարարությամբ՝ ասելով, որ միայն «միջազգային հանրության ակտիվ և կոշտ միջամտությունը» կօգնի կանխել Արցախում իրավիճակի վատթարացումը։

Առավոտյան ելույթ ունեցավ Արցախի նախագահին առընթեր Հակաճգնաժամային խորհրդի նախագահ Տիգրան Պետրոսյանը՝ հայտարարելով, որ բանակցությունների ձևաչափը փոխվել է այն բանից հետո, երբ Լավրովն Արցախն անվանել է «ազգային փոքրամասնություն» Ադրբեջանի կազմում, իսկ Բաքուն հրաժարվում է ուղիղ երկխոսությունից։ Օգոստոսի 1-ին ԱՄՆ-ի միջնորդությամբ Բրատիսլավայում պետք է կայանար Ստեփանակերտի և Բաքվի ներկայացուցիչների հանդիպումը, սակայն Ադրբեջանը երկրորդ անգամ հրաժարվեց հանդիպումից։ Վաղը կամ մյուս օրը միջնորդները կժամանեն Երեւան՝ որոշելու հետագա անելիքները, ասաց Տիգրան Պետրոսյանը։

Բրատիսլավայի փոխարեն Բայրամովն այսօր գնաց Անկարա, որտեղ Էրդողանն ասաց, որ Հայաստանը «հրատապ պետք է բացի Զանգեզուրի միջանցքը», պայմանագիր ստորագրի Բաքվի հետ, որպեսզի հայ-թուրքական հարաբերությունները կարգավորվեն։ Թուրքիայի ԱԳ նախարարը Լաչինի միջանցքը, որտեղ Բաքուն 6-րդ օրն է թույլ չի տալիս մարդասիրական շարասյան անցումը, իսկ շաբաթ օրը Կարմիր խաչի մեքենայից առևանգել է հիվանդ հային, անվանել է «Ադրբեջանի տարածք»։

Եվրոպայի խորհրդի խորհրդարանական վեհաժողովի նախագահ Թինի Քոքսը կոչ է արել Եվրոպայի խորհրդի Նախարարների կոմիտեին փաստահավաք առաքելություն ուղարկել՝ գնահատելու Լեռնային Ղարաբաղում իրավիճակը։

Գերմանիայի Բունդեսթագի արտաքին հարաբերությունների հանձնաժողովի նախագահ Միխայել Ռոթը Ադրբեջանին մեղադրել է Լեռնային Ղարաբաղում էթնիկ զտումներ իրականացնելու մեջ։ «Ադրբեջանն արգելափակում է մարդասիրական օգնությունը Լեռնային Ղարաբաղին։ Սա միջազգային իրավունքի խախտում է։ Եթե ​​նույնիսկ Լեռնային Ղարաբաղը պատկանում է Ադրբեջանին, դա չի արդարացնում էթնիկ զտումները։ ԵՄ-ն և ԱՄՆ-ը պետք է հստակ դիրքորոշում ունենան. Հայաստանը չպետք է դառնա Ռուսաստանի «որսը»»,- գրել է Ռոթը։