Արցախում 2023 թվականի առաջին կիսամյակում ծնունդների թիվը գերազանցել է մահացության դեպքերը, ընդ որում՝ բնական աճը գերազանցել է նախորդ տարվա նույն ժամանակաշրջանի ցուցանիշը: Այս մասին «Արմենպրես»-ի հարցմանն ի պատասխան հայտնեցին Արցախի ազգային վիճակագրական ծառայությունից՝ հավելելով, որ ընթացիկ տարվա առաջին հինգ ամիսներին ծնված երեխաների 51,5 տոկոսը տղաներ են, իսկ 48,5 տոկոսը՝ աղջիկներ:

Աղբյուրի տեղեկատվությամբ՝ նախորդ տարվա նույն ժամանակաշրջանի համեմատ ընթացիկ տարվա առաջին կիսամյակում նվազել է գրանցված ամուսնությունների ու ամուսնալուծությունների թիվը:

Տեղի է ունեցել հեռախոսազրույց Հայաստանի Հանրապետության վարչապետ Նիկոլ Փաշինյանի և Ռուսաստանի Դաշնության նախագահ Վլադիմիր Պուտինի միջև:

Ինչպես «Արմենպրես»-ը տեղեկանում է ՀՀ կառավարության տարածած հաղորդագրությունից, քննարկվել են Լաչինի միջանցքի ապօրինի արգելափակման հետևանքով Լեռնային Ղարաբաղում ստեղծված հումանիտար ճգնաժամը և այն հաղթահարելու ուղիները:

Հայկական կողմի նախաձեռնությամբ ՌԴ նախագահ Վլադիմիր Պուտինը հեռախոսազրույց է ունեցել Հայաստանի վարչապետ Նիկոլ Փաշինյանի հետ, հայտնում է Կրեմլը։
Քննարկվել է Լեռնային Ղարաբաղի շուրջ ստեղծված իրավիճակը, այդ թվում՝ Լաչինի միջանցքով անարգել տրանսպորտային կապի ապահովման հարցեր։ Ընդգծվել է 2020-2022 թվականներին Ռուսաստանի, Հայաստանի և Ադրբեջանի ղեկավարների միջև պայմանավորվածությունների ամբողջ փաթեթի հետևողական իրականացման հիմնարար նշանակությունը։
Ռուսաստանի նախագահը հաստատել է ռուսական կողմի պատրաստակամությունը՝ շարունակելու գործնական աջակցությունը հայ-ադրբեջանական հաշտության պայմանագրի պատրաստման գործում։
Պայմանավորվածություն է ձեռք բերվել շարունակել շփումները տարբեր մակարդակներով։

Արցախի կառավարությունն ընդունել է որոշում, որն արդեն հաստատվել է նախագահի կողմից, 2023 թվականի հունիսի 15-ից Ադրբեջանի կողմից Արցախի Հանրապետության ամբողջական շրջափակման հետևանքով առաջացած սննդամթերքը խնայելու անհրաժեշտությամբ պայմանավորված՝ սննդի ծառայությունների սահմանափակումների մասին։

Կառավարության որոշման համաձայն.

1. 2023 թվականի հուլիսի 5-ի ժամը 09:00-ից հանրային սննդի օբյեկտներում արգելվում է.
1) տոնական, ընտանեկան կամ անհատական ​​այլ միջոցառումների կազմակերպում և անցկացում (բացառությամբ հարսանեկան ճաշկերույթների՝ մինչև 50 հոգու մասնակցությամբ).
2) 30-ից ավելի անձանց մասնակցությամբ սգո միջոցառումների կազմակերպում և անցկացում.
3) սննդամթերքի պատրաստում և վաճառք` մատուցման և առաքման ձևով (խոհարարական արտադրանքի սպառում), բացառությամբ սուրճի, թեյի, խմիչքի, պաղպաղակի, հրուշակեղենի մատուցման.

2. Սույն սահմանափակումների 1-ին կետի դրույթները տարածվում են նաև այն դեպքերի վրա, երբ հանրային սննդի կազմակերպիչները հանրային սննդի ծառայություններ են մատուցում հանրային սննդի օբյեկտներից դուրս (սպառողի ընտրած վայրում):

3. Հանրային սննդի օբյեկտներ են համարվում հանդիսությունների սրահները, ռեստորանները, ճաշարանները, սրճարանները, բարերը, բուֆետները, ինչպես նաև հյուրանոցների, զբոսաշրջային տների սննդի օբյեկտները:

Հրապարակումից հետո հայտնվեցին որոշման կողմնակիցներ ու հակառակորդներ։

Կառավարության որոշման կողմնակիցները կարծում են, որ լիակատար շրջափակման պայմաններում պետք է համեստ ապրել և խնայել սնունդը, քանի որ հայտնի չէ, թե որքան կտևի նման իրավիճակը։ Նրանք նաև կարծիք հայտնեցին, որ խանութները դատարկ լինելու դեպքում անընդունելի է խնջույքներ կազմակերպել, առավել ճիշտ է կիսել պաշարները։

Բայց կան մարդիկ, ովքեր կարծում են, որ անհնար է միջամտել անհատ ձեռներեցների աշխատանքին, և նրանք իրավունք ունեն ինքնուրույն կազմակերպել աշխատանքներն իրենց հայեցողությամբ, հնարավոր է, որ սննդի օբյեկտը գյուղաբնակներից է սնունդ գնում կամ ունի իր սեփական ֆերման կամ պաշարները։

Բայց մեծամասնությունը համաձայնեց, որ ժամանակի ընթացքում սննդի և վառելիքի բացակայության պատճառով հանրային սննդի բոլոր օբյեկտները կդադարեն ամբողջությամբ աշխատել, իսկ որոշներն ընդհանրապես կփակվեն։ Եվ լավ կլիներ, որ կառավարությունը դիտարկեր տեղական արտադրանքը գյուղերից քաղաքային շուկա հասցնելու հնարավորությունը։

Ադրբեջանական ԶԼՄ-ները տեղեկացրել են ՉԹՕ-ի մասին Բաքվի երկնքում։

«Հուլիսի 5-ին, առավոտյան ժամը 7-ին մայրաքաղաքի երկնքում նկատվել է չբացահայտված թռչող օբյեկտ (ՉԹՕ)։ Իր առանցքի շուրջը պտտվող ափսեի տեսք ունեցող օբյեկտը թռել է հյուսիսից հարավ։ Պտտվելիս օբյեկտից պայծառ լույս է արձակվել»,- նշել է «Թուրանը»։

Հուլիսի 4-ի ժամը 18:55-ից հուլիսի 5-ի ժամը 00։10- ն ընկած ժամանակահատվածում Ադրբեջանի ԶՈւ-ն Շուշիի և Մարտակերտի շրջանների ուղղությամբ խախտել է հրադադարը` կիրառելով հրաձգային զենք։ Արցախի ՊՆ մամուլի ծառայությունից հայտնում են, որ հայկական կողմը կորուստներ չունի։

Հրադադարի խախտման մասին հաղորդվել է ՌԴ խաղաղապահ զորակազմի հրամանատարությանը։

Հուլիսի 5֊ի ժամը 09։30-ի դրությամբ իրավիճակը շփման գծում հարաբերականորեն կայուն է։

Հուլիսի 4-ին Ժնևում ՄԱԿ-ի Մարդու իրավունքների խորհրդում (ՄԻԽ) Հայաստանի նախաձեռնությամբ ընթերցվեց համատեղ հայտարարություն՝ նվիրված Ցեղասպանության հանցագործության կանխարգելման և պատժման կոնվենցիայի 75-րդ տարելիցին։ Հայտարարությանը միացել էին ՄԱԿ-ի բոլոր տարածաշրջանային խմբերն ընդգրկող քառասունմեկ պետություններ։ Հայտարարությունը կարդաց Հայաստանի մշտական ներկայացուցիչ, դեսպան Անդրանիկ Հովհաննիսյանը՝ Ցեղասպանության կանխարգելման հարցով ՄԱԿ-ի Գլխավոր քարտուղարի հատուկ խորհրդական Ալիս Ուայրիմու Նդերիտուն հետ ՄԻԽ ինտերակտիվ երկխոսության ժամանակ։

Հայտարարության մեջ մասնավորապես նշվում էր, որ ցեղասպանությունը երբեք անակնկալ տեղի չի ունենում: Որպես կանոն, դրան նախորդում են ազգային, ռասայական կամ կրոնական խմբի հանդեպ խտրականության դրսևորումներ, ինչպես նաև մարդու իրավունքների ոտնահարման և խախտման կրկնվող դեպքեր: Հայտարարությանը միացող երկրները ևս մեկ անգամ հանձնառություն ստանձնեցին կանխելու ցեղասպանությունները և մարդկության դեմ այլ հանցագործությունները։

Համատեղ հայտարարության մեջ շեշտվում էր, որ հրավիրելով աշխարհի ուշադրությունն այն իրավիճակներին, որոնք կարող են հանգեցնել նման ոճրագործությունների, անհրաժեշտ է նաև հետագա գործողություններ և համակարգված ջանքեր գործադրել՝ կանխարգելումը գործնականում իրականցնելու համար:

Ստորև ԱԳՆ-ն ներկայացրել է ամբողջական հայտարարությունը.

Համատեղ հայտարարություն

Ցեղասպանության հանցագործության կանխարգելման և պատժման կոնվենցիայի 75 ամյակի կապակցությամբ

ՄԱԿ-ի Մարդու իրավունքների խորհրդի Ինտերակտիվ երկխոսություն Ցեղասպանության կանխարգելման հարցով ՄԱԿ-ի Գլխավոր քարտուղարի հատուկ խորհրդականի հետ

ՀՀ Մշտական ներկայացուցիչ Անդրանիկ Հովհաննիսյան

«Հարգելի պարոն նախագահ,

Պատիվ ունեմ ներկայացանելու այս հայտարարությունը ՄԱԿ-ի բոլոր տարածաշրջանային խմբերն ընդգրկող քառասունմեկ պետությունների կողմից։

Ողջունում ենք Հատուկ զեկուցող Նդերիտուին և վերահաստատում մեր շարունակական աջակցությունը Գլխավոր քարտուղարի՝ Ցեղասպանությունների կանխարգելման և Պաշտպանելու պարտավորության հարցերով խորհրդականների գրասենյակի գործունեությանը:

Այս տարի նշում ենք Ցեղասպանության հանցագործության կանխարգելման և պատժման կոնվենցիայի 75-րդ տարելիցը: Այն մարդու իրավունքներին առնչվող առաջին փաստաթուղթն էր, որն ընդունվեց ՄԱԿ Գլխավոր ասամբլեայի կողմից՝ Մարդու իրավունքների համընդհանուր հռչակագրի ընդունումից մեկ օր առաջ: Այս երկու փաստաթղթերը միասին ուրվագծեցին այն աշխարհի տեսլականը, որում ցեղասպանությունը և մարդկության դեմ այլ հանցագործությունները կկանխվեն և կպատժվեն:

Այս տարելիցը հնարավորություն է տալիս վերահաստատել մեր հանձնառությունը հասնելու այս նպատակին, ինչպես նաև մտորելու դրական փորձի և մարտահրավերների մասին, որոնք առնչվում են այս կոնվենցիայի կիրառմանը:

Ցեղասպանությունը երբեք անակնկալ տեղի չի ունենում: Որպես կանոն, դրան նախորդում են խտրականության դրսևորումներ ազգային, էթնիկ, ռասայական կամ կրոնական խմբի հանդեպ, ինչպես նաև մարդու իրավունքների ոտնահարման և խախտման կրկնվող դեպքեր:

Մենք հանձ ենք առնում մոբիլիզացնել մեր քաղաքական կամքը՝ կանխելու ցեղասպանությունները և մարդկության դեմ այլ հանցագործությունները, կիրառելով Գլխավոր քարտուղարի Մարդկության դեմ հանցագործությունների վերլուծական շրջանակը: Ցեղասպանության վտանգ պարունակող իրավիճակներին հստակ արձագանքման ձախողումը ոչ մի արդարացում չունի:

Մենք շեշտում ենք ՄԱԿ-ի մարդու իրավունքների պաշտպանության համակարգի, ներառյալ՝ այս Խորհրդի, Բարձր հանձնակատարի գրասենյակի, հատուկ զեկուցողների, պայմանագրային մարմինների դերը՝ մարդու իրավունքների և միջազգային մարդասիրական իրավունքի այն ոտնահարումների վերաբերյալ տեղեկատվության հավաքման գործում, որոնք կարող են հանգեցնել ցեղասպանության։

Հրավիրելով աշխարհի ուշադրությունն այն իրավիճակներին, որոնք կարող են հանգեցնել նման ոճրագործությունների, անհրաժեշտ է նաև հետագա գործողություններ և համակարգված ջանքեր գործադրել՝ կանխարգելումը գործնականում իրականցնելու համար:

Շնորհակալություն»: