Ազատություն
Արցախն Ադրբեջանի մաս ճանաչելը քրեականացնելու նպատակով մի խումբ քաղաքացիներ՝ հանրային, մշակույթի գործիչներ, նախկին պաշտոնյաներ ու պատգամավորներ ստորագրահավաք են նախաձեռնել՝ «Հայաքվե» խորագրով։
Նախաձեռնության հեղինակներն առաջարկում են Քրեական օրենսգրքում լրացում կատարել և Հայաստանի անունից Արցախն Ադրբեջանի մաս ճանաչող պաշտոնատար անձանց համար պատիժ սահմանել՝ 10-ից 15 տարվա ազատազրկում։
«Առաջին կետը նախատեսում է քրեականացնել Հայաստանի Հանրապետության անունից Արցախի ճանաչումը այլ պետության կազմում, երկրորդ կետը նախատեսում է քրեականացնել Հայաստանի Հանրապետության անունից Հայոց ցեղասպանության միջազգային ճանաչումից հրաժարումը: Ինչո՞ւ հենց այդ երկու կետերը, որովհետև այդ երկու կետերն ուղիղ կերպով նշված են որպես համազգային նպատակներ Հայաստանի Հանրապետության անկախության հռչակագրում, որն ընդունվել է 1990 թվականի օգոստոսի 23-ին և որպես այդպիսին հանդիսանում են Հայաստանի սահմանադրական կարգի հիմք», – ասաց «Հայաքվե»-ի համակարգող Ավետիք Չալաբյանը:
Եթե Հայաստանի 50 հազար քաղաքացիների ստորագրություն հավաքվի, ապա, ըստ Սահմանադրության, հարցը պետք է մտնի Ազգային ժողովի օրակարգ։ Իսկ եթե խորհրդարանն այն չհաստատի՝ անհրաժեշտ կլինի 300 հազար ստորագրություն՝ նախագիծը հանրաքվեի դնելու համար։
«Ամեն շաբաթվա վերջում «Հայաքվե»-ն նախաձեռնող խումբը կհրապարակի այդ շաբաթվա ընթացքում հավաքված ստորագրությունների թվերը: Ընդ որում, պետք է նկատի ունենալ, որ ստորագրահավաքը տեղի է ունենում ֆիզիկական ռեժիմով, ինչպես նաև էլեկտրոնային ստորագրահավաք է տեղի ունենում, երկու թիվն էլ յուրաքանչյուր շաբաթվա վերջում կհրապարակենք», – նշեց Չալաբյանը:
Արդյոք կարող է նախաձեռնությունը հասնել հաջողության այն պարագայում, երբ վարչապետ Նիկոլ Փաշինյանն անձամբ է հայտարարել, որ Հայաստանը ճանաչում է Արցախն Ադրբեջանի մաս, իսկ խորհրդարանում մեծամասնությունը նրա ղեկավարած թիմն է։ «Հայաքվե»-ի համակարգող Ավետիք Չալաբյանը պնդում է՝ վարչապետի խոսքը իրավական հիմք չունի՝ իրենք այս ստորագրահավաքը սկսել են, որպեսզի Փաշինյանի հայտարարությունները իրավական ամրագրում չստանան:
«Նույնիսկ պայմանագիր կնքված չի, խոսքը գնում է բանավոր հայտարարության մասին, որն իրավական ուժ չունի, բնականաբար, որքան էլ որ Ադրբեջանը փորձի ներկայացնել, որ դա իրավական ուժ ունի: Բնականաբար, իրավական ուժ չունի և այդ ամբողջ գործընթացով նախ պետք է անցնել, երկրորդը, մենք հիմա ենք սկսել այս «Հայաքվե»-ի գործընթացը հենց այդ պատճառով, որպեսզի ըստ էության, մենք հակառակ կողմից կարողանանք արգելակել, Արցախն Ադրբեջանի կազմում ճանաչելու սկսված գործընթացը թույլ չտանք, որ տեղի ունենա», – նշեց նա:
