Եվրախորհրդարանը հիշեցրել է Ալիևի դեմ պատժամիջոցների անհրաժեշտության մասին. համատեղ հայտարարություն

Աղդամի միջոցով Ադրբեջանի օգնության առաջարկը կապված չէ Լաչինի միջանցքի նկատմամբ նրա ստանձնած պարտավորությունների հետ, որոնք պետք է հարգվեն: Մարդասիրական օգնությունը պետք է թույլ տրվի տարածաշրջան, և մուտքի ցանկացած խոչընդոտ հանդիսանում է միջազգային մարդասիրական իրավունքի խախտում:

Լրացուցիչ երթուղիների բացումը միայն կարելի է խրախուսել, բայց դա առանձին հարց է, որը պետք է փոխհամաձայնեցվի Բաքվի և Ստեփանակերտի միջև ուղիղ բանակցությունների համատեքստում։

Մենք լիովին աջակցում ենք Եվրոպական խորհրդի նախագահ Շառլ Միշելի դիվանագիտական ​​ջանքերին` գտնելու կայուն և տեւական լուծում երկարատև հակամարտության և տարածաշրջանում շարունակվող ճգնաժամի համար՝ հեշտացնելով Հայաստանի և Ադրբեջանի միջև բանակցությունները: 2023 թվականի հուլիսի 15-ին Բրյուսելում կայացած վերջին հանդիպման ժամանակ երկու կողմերը, ի թիվս այլ հրատապ հարցերի, պայմանավորվել են դյուրացնել մարդասիրական օգնության հասանելիությունը տարածաշրջան՝ մարդկային տառապանքը մեղմելու նպատակով։ Ցավոք, շարունակվող շրջափակումը հակասում է խաղաղության բանակցությունների նպատակին և վստահության ամրապնդման համար անհրաժեշտ ջանքերին:

Հիշեցնենք, որ 2023 թվականի մարտի 15-ին Եվրախորհրդարանը կոչ է արել Խորհրդին, «եթե Արդարադատության միջազգային դատարանի 2023 թվականի փետրվարի 22-ի վճիռն անհապաղ չիրագործվի, նպատակային պատժամիջոցներ սահմանել Ադրբեջանի կառավարության պաշտոնյաների դեմ»:

Հիշում ենք նաև, որ 2023 թվականի հունիսի 13-ին Եվրախորհրդարանի լիագումար նիստում ԵՄ բարձր ներկայացուցիչը պարտավորվել է Խորհրդում բարձրացնել նման պատժամիջոցների կիրառման հարցը։

Մենք կրկնում ենք Բաքվին ուղղված մեր կոչը՝ անհապաղ դադարեցնել շրջափակումը և պարտավորվել կատարել միջազգային պարտավորություններն ու նորմերը՝ հումանիտար աղետը կանխելու համար»։