Եթե ՀՀ վարչապետը չգնա այդ քայլին, մենք ստիպված ենք լինելու դիմել այլ երկրներին

2020 թվականի պատերազմի ժամանակ Արցախից բռնի տեղահանված անձինք երկարատև բողոքի ցույցեր են անցկացնում կառավարության շենքի մոտ։ Երեկ «Վերադարձ դեպի Դիզակ» և «Հանուն Հադրութի» ՀԿ-ների ղեկավարները բաց նամակով դիմել են՝ Արցախում ՄԱԿ-ի բազմազգ խաղաղապահ զորքեր տեղակայելու կոչով։

«Վերադարձ Դիզակ» ՀԿ նախագահ Մարգարիտա Քարամյանը Step1.am-ի հետ զրույցում ասաց.

ՀՀ Սահմանադրության համաձայն, Հայաստանի Հանրապետությունը պարտավորված է լինել Արցախի Հանրապետության բնակչության անվտանգության երաշխավորը։

Ցավոք, ՀՀ վարչապետը՝ խախտելով Սահմանադրությւնն ու Հայաստանի Հանրապետության Անկախության հռչակագիրը, չունենալով լիազորություններ, փոխանցել է այդ երաշխավորի գործառույթը, Արցախի բնակչության բոլոր իրավունքները այլ երկրի՝ Ռուսաստանին և շարունակում է սպասարկել օտար երկրների, տվյալ դեպքում, Ռուսաստանի և Թուրքիա-Ադրբեջան տանդեմի շահերը, ցեղասպանության վտանգի տակ դնելով 120 հազար մեր  հայրենակիցներին։

Հենց ինքը՝ Փաշինյանը, տարբեր առիթներով, այդ թվում, կառավարության նիստերի ժամանակ հայտարարել է, որ Ադրբեջանը Արցախում ցեղասպանություն է նախապատրաստում։ Ու որևե տրամաբանության մեջ չի տեղավորվում, թե ինչպես է ինքը, գիտակցելով նման վտանգը, հրաժարվում արցախահայության անվտանգության երաշխիքների ապահովումից։

Եթե նույնիսկ վարչապետի վրա ճնշում կա, նա Սահմանադրությամբ իրավունք չունի դուրս գալ իր լիազորություններից, թեկուզ այնպիսի տպավորություն է, որ ինքը գիտակցաբար պառակտում է մեր ժողովրդին և ավելի խորացնում մեր ազգի բարոյալքվածությունը։

Մի կողմ թողնելով հուզականությունը, մենք պահանջում ենք, որ ՀՀ վարչապետը գործի ըստ Սահմանադրության և ՀՀ անկախության Հռչակագրի համաձայն։ Իսկ դա նշանակում է, որ ներկայիս օրհասական պայմաններում ՀՀ կառավարությունը պետք է դիմի ՄԱԿ Անվտանգության Խորհուրդ և պահանջի օրակարգ մտցնել Արցախի հանրապետությունում ստեղծված ցեղասպանական իրավիճակի հարցը։

Մենք վճռական ենք տրամադրված․ եթե ՀՀ վարչապետը չգնա այդ քայլին, մենք ստիպված ենք լինելու դիմել այլ երկրների, որպեսզի իրենք ստանձնեն այդ դերը և փրկեն մեր հարազատներին այն բոլոր վտանգներից, որի առջև նրանք կանգնած են։ Դեռ մի կողմ թողենք հումանիտար աղետը, մեզ բոլորիս զրկում են մեր իրավունքներից ու պետականությունից, և ՀՀ իշխանությունը աջակցում է այդ հրեշավոր պլանի իրականացմանը։

Մեր սպասումները այնքան էլ մեծ չեն, սակայն մենք չենք հրաժարվելու մեր սահմանադրական իրավունքներից և շարունակելու ենք մեր պայքարը։ Սարսափելի է տեսնել մեր ազգի դեգրադացիան, բայց դա հետ չի պահի մեզ։ Մենք կշարունակենք մեր սակավաթիվ, բայց արդյունավետ ակցիաները։