Օսիպյան. Պետք է պարզել, թե ինչպես են ռուս խաղաղապահներն ապահովելու խաղաղ ակցիայի անվտանգությունը

Միջանցքի ապաշրջափակման ժողովրդական շարժման շտաբը ռուսական խաղաղապահ զորախմբից պատասխան է պահանջել Ադրբեջանի մեղադրանքների և դեպի Հաքարի կամուրջ խաղաղ ակցիայի մասնակիցների անվտանգությունն ապահովելու խաղաղապահների գործողությունների վերաբերյալ։

«Այսօր մեղադրանքներ են հնչել Ռուս խաղաղապահ զորախմբի հասցեին, իբր, խաղաղապահները ցանկանում են օգտվել մեր խաղաղ ակցիայից և գրոհել կամուրջը։ Մեզ պետք չեն սադրանքներ, բախումներ զինվորականների հետ, ուստի գեներալ-գնդապետ Ա.Լենցովից պահանջում ենք պատասխան նման հայտարարություններին։

Մենք խաղաղ ակցիա ենք նախապատրաստում, և դրա անվտանգությունը պետք է ապահովվի։ Բայց եթե խաղաղապահների հրամանատարությունը կամուրջը գրոհելու ծրագիր ունի, թող մեզ հետ համաձայնեցնեն, որ ակցիային չմասնակցեն կանայք ու երեխաներ, ինչպես նաև անպատրաստ մարդիկ։ Ցանկալի է, որ ՌՂԶ հրամանատարությունը հրապարակայնորեն հայտարարի իր ծրագրերի և մտադրությունների մասին։ Ցանկալի կլիներ, որ գեներալ Լենցովը ժամանակ գտնի Շարժման նախաձեռնող խմբի հետ հանդիպելու համար, քանի որ հնչող մեղադրանքները լուրջ են։ Եվ, որն ամենակարեւորն է, պետք է պարզել, թե ինչպես են խաղաղապահները ապահովելու քաղաքացիական խաղաղ ակցիայի անվտանգությունը Քաշաթաղի (Լաչինի) միջանցքում»,- ֆեյսբուքյան ուղիղ եթերում ասաց Շարժման համակիր Արթուր Օսիպյանը։