Ռուսաստանը մեզ ստիպում է «ինտեգրվել» Գոլոդոմորի միջոցով

Հադրութի քաղաքապետ, Արցախի նախագահին առընթեր հակաճգնաժամային խորհրդի անդամ Վահան Սավադյանը պնդում է, որ «Արցախի ղեկավարությունը մերժել է Լավրովի ռուսական պլանը»։

«Մենք բոլորս սպասում էինք, որ Մոսկվայում կայացած հանդիպմանը Ռուսաստանը կլուծի Արցախում հումանիտար ճգնաժամի խնդիրը, բայց պարզվեց, որ պարոն Լավրովն իր անհեթեթություններով էլ ավելի սրեց իրավիճակը։ Մեր քաղաքացիները վերադարձան 44-օրյա պատերազմից հետո՝ հավատալով ՌԴ նախագահ Պուտինին, ով բազմիցս հայտարարել է, որ Ռուսաստանի Դաշնությունը տարածաշրջանի անվտանգության երաշխավորն է, և հայերը կկարողանան արժանապատիվ ապրել Արցախում։ Պետք է պարոն Լավրովին հարցնել՝ որտե՞ղ է այս արժանի կյանքը։ Թե՞ նա կարծում է, որ մեր իրողությունները արժանի կյանք են։ Մենք ակնկալում էինք, որ Մոսկվայում (հուլիսի 25-ին) եռակողմ հանդիպման ժամանակ Ռուսաստանը որոշ քայլեր կձեռնարկի Լաչինի միջանցքի ապաշրջափակման, ինչպես նաև կենսական նշանակություն ունեցող ապրանքների տեղափոխման ուղղությամբ։ Բայց պարզվեց, որ Ռուսաստանը Ադրբեջանի հետ միասին 21-րդ դարում մեզ ստիպում է ինտեգրվել Գոլոդոմորի միջոցով»։

Սավադյանը նշեց, որ Արցախի հասարակական կառույցներն ակնկալում էին կոնկրետ քայլեր՝ 2020 թվականի նոյեմբերի 9-ի հայտարարությունը համապատասխան, մասնավորապես՝ 6-րդ կետը, որում ասվում է, որ Լաչինի 5 կիլոմետրանոց միջանցքը պետք է գտնվի ռուսական խաղաղապահ կոնտինգենտի վերահսկողության տակ։

Արցախի խորհրդարանի հայտարարության առնչությամբ, ըստ Հադրութի քաղաքապետի, «հասարակության մեծամասնությունը դրական է արձագանքել, բայց…»։

«Բայց այս հայտարարությունը պետք է արվեր շրջափակման առաջին օրերին։ Ընդհանրաապես, խորհրդարանը պետք է ավելի ակտիվ լինի այս կրիտիկական ժամանակներում»:

Վահան Սավադյանը կարծում է, որ, բացի կոչերից, միջանցքը ապաշրջափակելու համար միջազգային հանրության կողմից կոնկրետ քայլեր են անհրաժեշտ։ «Որպեսզի համաշխարհային հանրության հայտարարություններն ավելի առարկայական դառնան, անհրաժեշտ են կոնկրետ քայլեր միջանցքի ապաշրջափակման, Արցախի քաղաքացիների ազատ տեղաշարժի և մարդասիրական բեռների փոխադրման ապահովման ուղղությամբ»։