Ղարաբաղը դիմադրում է և փոխում իշխանության վեկտորը
- 17:50 07.08.2023
Արայիկ Հարությունյանի երեկվա հայտարարությունը պայքարը շարունակելու և դժվարություններին դիմակայելու մասին՝ որպես պայքարի մաս, հասարակության մեջ ընկալվեց որպես մեսիջ։ Սկսվեց ուժերի կենտրոնացում շրջափակմանը դիմակայելու համար, քանի որ որ դրան այլընտրանք չկա։
Որոշ փորձագետներ նշում էին, որ արցախցիների դիմադրությունը և չհանձնվելու պատրաստակամությունը շատերի պլանների վրա են խաչ քաշել։ Թուլամորթներն ու չարախոս քննադատները կարծում էին, որ Արցախը երկար չի դիմանա և կընկնի, բարի կամեցողները չէին ցանկանում, որ արցախցիները նորից անցնեն սովի, ցրտի ու ավերածությունների միջով։
Կրթության նախարարությունը դիմել է արցախցիներին՝ խնդրելով հատուկ ստեղծված կենտրոններում հավաքել մանկական ուսապարկեր, նոթատետրեր և գրիչներ, որպեսզի մինչև սեպտեմբերի 1-ը առաջին դասարանցիներին նվերներ մատուցեն։ Ֆինանսների նախարարությունը բնակիչներին խնդրել է չհանել ամբողջ կանխիկ գումարը և գումարները պահել բանկերում՝ դրամաշրջանառությունը չբարդացնելու համար։ Գյուղատնտեսության նախարարությունն էլ է գլխի ընկել, թե ինչպես կարելի է գյուղերից սնունդ հասցնել քաղաք։ Փուռերում նորից ալյուր է հայտնվել. Արցախում հացահատիկի բերքահավաքն ավարտվել է։
Միաժամանակ փոփոխություններ եղան քաղաքական ղեկավարության մեջ։ Խորհրդարանի նախագահ ընտրվեց ՀՅԴ-ից Դավիթ Իշխանյանը։ ՀՅԴ Բյուրոյի ներկայացուցիչ Հակոբ Տեր-Խաչատուրյանի խոսքով, Իշխանյանին առաջադրել են Արցախի երեք նախագահները, այդ թվում՝ գործողը։ «Դաշնակցությանն առաջարկել են մեծացնել իր դերը Արցախի իշխանության մեջ»,- «Ապառաժ»-ի հետ զրույցում ասաց նա։ Տեր-Խաչատուրյանը նշեց, որ խոստացվել է բարձրացնել խորհրդարանի դերը և ընդլայնել պատասխանատվության շրջանակը, որպեսզի Ազգային ժողովը վճռորոշ դերակատարում ունենա քաղաքական գործընթացներում, մասնավորապես՝ կարգավիճակի, անվտանգության, բանակցությունների և արտաքին քաղաքականություն մեջ։ Ըստ այդմ, խորհրդարանի նախագահը պետք է ունենա ազդեցություն, գործիքներ, քաղաքական հնարավորություններ։
«Արցախի ժողովրդի անվտանգությունը, բարեկեցությունն ու զարգացումը, արցախյան հիմնախնդրի ինքնորոշման հիման վրա կարգավորումը, ճգնաժամի հաղթահարումը Դաշնակցության հրամայականն են»,- ասաց Տեր-Խաչատրյանը։
Այսպիսով, կարելի է պնդել, որ Արցախում իշխանության վեկտորը փոխվել է։ Եթե Տեր-Խաչատրյանի ասածն իրականություն դառնա, ապա Արցախի խորհրդարանը բանակցելու և որոշումներ կայացնելու բացառիկ իրավասություններ կստանա, և աշխարհասփյուռ հայության կողմից սատարվող ՀՅԴ-ի դիրքորոշումը կգերակայի։