Մասիս Մայիլյանը՝ «Կոմերսանտին». Ուզում են մեր ժողովրդին ստիպել հրաժարվել ինքնորոշման իրացված իրավունքից

Ռուսական «Կոմերսանտը» ծավալուն հոդված է հրապարակել Հայաստանի և Ադրբեջանի միջև «խաղաղության պայմանագրի» շուրջ բանակցությունների «դադարի» մասին, որում բացել է «փոքրիկ գաղտնիք»։

Ըստ «Կոմերսանտ»-ի զրուցակցի՝ հունիսի 25-ին «Լավրովն առաջարկել է մի տարբերակ, որին ի սկզբանե համաձայնել են և՛ ադրբեջանական կողմը, և՛ ղարաբաղցիները։ Դրա էությունն այն էր, որ Աղդամով ճանապարհը բացվի, և ԿԽՄԿ-ի միջոցով սկսվի անհրաժեշտ ապրանքների առաքումը։ Իսկ այս վայրում երթեւեկության մեկնարկից ուղիղ մեկ օր անց, Մոսկվայի առաջարկով, վերականգնվի նաեւ երթեւեկությունը Լաչինի միջանցքում։

«Սակայն, ըստ նրա, Ստեփանակերտը այն ժամանակ դրեց պայման, որ Լաչինը բացվի ոչ թե 24 ժամում, այլ անմիջապես, հետո ԼՂՀ-ն հայտարարեց, որ ադրբեջանական ծագման ապրանքները չպետք է առաքվեն Աղդամով, հետո սկանդալ եղավ Վագիֆ Խաչատրյանի հետ, ում անհապաղ ազատ արձակումը պահանջում էին ԼՂՀ իշխանությունները: Արդյունքում փոխզիջում չստացվեց»,- գրում է Коммерсантъ-ը։

«Տարածաշրջանում այլ հաղորդակցությունների ներգրավման թեմայի քննարկումը կարող է հնարավոր դառնալ Լաչինի միջանցքի բացումից և ռուսական խաղաղապահ կոնտինգենտի կողմից այդ երթուղու ամբողջական վերահսկողության վերականգնումից հետո՝ համաձայն նոյեմբերի 9-ի Եռակողմ հայտարարության վեցերորդ կետի»,- «Կոմերսանտ»-ին տված մեկնաբանությունում ասել է ԼՂՀ նախագահի հատուկ հանձնարարությունների դեսպան, Արցախի ԱԳ նախկին նախարար Մասիս Մայիլյանը։

Սա ոչ թե մարդասիրական, այլ քաղաքական խնդիր է, ասաց Մայիլյանը։

«Սննդամթերքի, դեղերի և առաջին անհրաժեշտության պարագաների բացակայությունը՝ Ադրբեջանի կողմից արհեստականորեն ստեղծված անօրինական շրջափակման արդյունք է։ Բաքուն օգտագործում է շրջափակումը որպես զենք և ճնշման միջոց Լեռնային Ղարաբաղի Հանրապետության ժողովրդի դեմ՝ ստիպելու մեր քաղաքացիներին հրաժարվել իրենց հավաքական իրավունքներից, առաջին հերթին՝ իրացված ինքնորոշման իրավունքից։ Այսպիսով, Ադրբեջանը օգտագործում է մարդկանց տառապանքն ու իր իսկ կողմից ստեղծած հումանիտար աղետը՝ սեփական քաղաքական նպատակներին հասնելու համար։ Մենք ակնկալում ենք, որ միջազգային կառույցներն ու պետությունների ղեկավարները խոսքից գործի կանցնեն՝ վերջ դնելու Ադրբեջանի կողմից ԼՂՀ-ի և նրա ժողովրդի դեմ իրականացված միջազգային հանցագործություններին»,- ասաց Մասիս Մայիլյանը։