Բաքուն խոսեց երկրորդ տարբերակի մասին
- 15:15 14.08.2023
Այսպես կոչված ազերբայդժանի ԱԳՆ ՄԱԿ ԱԽ-ին Հայաստանի դիմումի կապակցությամբ սպառնացել է ռազմական գործողություններով, նշելով, որ «միջազգային հանրության համարժեք արձագանքը Հայաստանի սադրանքներին առավել քան երբևէ կարևոր են Հայաստանի և Ադրբեջանի միջև միջպետական հարաբերությունների կարգավորման և տեղի հայկական ծագման բնակիչների՝ Ադրբեջանի քաղաքական, իրավական և սոցիալ-տնտեսական շրջանակներին վերաինտեգրման գործընթացի առջև ծառացած դժվարությունները հաղթահարելու համար»։
«Հայաստանը օգոստոսի 5-ին խախտել է Աղդամ-Խանքենդի ճանապարհի օգտագործման եւ Եվլախում Ղարաբաղի հայկական համայնքի ներկայացուցիչների հետ հանդիպման կազմակերպման պայմանավորվածությունը (Լավրովի առաջարկը, ըստ Կոմերսանտ թերթի «բացահայտման»․ Լրագիր)։ Եթե Հայաստանը եւ նրա «ինքնահռչակ սուբյեկտը» կատարեին այդ պայմանավորվածությունները, հարցը կլուծվեր օգոստոսի սկզբին՝ ղարաբաղյան շրջանի բնակիչներին հումանիտար բեռների առաքման ընդունելի շրջանակների, ինչպես նաեւ մարդկանց, բեռների եւ տրանսպորտային միջոցների երթեւեկության ուղիների հեշտացման ապահովմամբ», ասվում է ազերբայդժանի ԱԳՆ հայտարարության մեջ։
ազերբայդժանի ԱԳՆ նշելով, թե Հայաստանը «իր տարածքային հավակնությունները չի դադարեցրել եւ ազերբայդժանի հետ սահմանի երկայնքով հերթական ռազմական արկածախնդրության նպատակով սպառազինության եւ զորակազմի լայնամասշտաբ կուտակումներ է անում», հայտարարում է․ «ազերբայդժանը իրեն իրավունք է վերապահում պաշտպանել իր ինքնիշխանությունը եւ տարածքային ամբողջականությունը բոլոր օրինական միջոցներով, որոնք նախատեսված են ՄԱԿ Կանոնադրությամբ եւ միջազգային իրավունքի այլ համընդհանուր փաստաթղթերով»։
Նախորդ հրապարակումներից մեկում անդրադարձել էինք ազերբայդժանի ԱԳՆ հայտարարությանը Կոմերսանտի հրապարակման կապակցությամբ, արձանագրելով, որ Նիկոլ Փաշինյանն ու իր անմիջական ենթակա Իլխամ Ալիեւը ակնհայտ ճգնաժամի մեջ են հայտնվել․ միջանցքի կամավոր բացման այլընտրանքը Բերձորի գրոհն է Գորիսի կողմից կամ, որպես եւս մեկ տարբերակ՝ կոտորածի կազմակերպումը Բաքվից: Երեքն էլ, սակայն, կնշանակեն 2018 թվականի առաջադրանքի անշնորհք տապալում: Նկատենք նաեւ, որ Բաքվի ԱԳՆ, ինչպես նախորդ անգամ, այս հայտարարության մեջ էլ սուբյեկտի մակարդակի է բարձրացնում Արցախի Հանրապետությունը (տես այստեղ)։
ազերբայդժանի ԱԳՆ հայտարարություններն այս իրողությունների վկայությունն են։ Բաքուն ՀՀ կառավարության նիստում Նիկոլի ելույթի ծիրում եւ ռուսների «աղդամյան այլընտրանքի» երաշխավորությամբ խոսում է երկրորդ տարբերակի մասին, միեւնույն ժամանակ վստահություն հայտնելով, որ ՄԱԿ ԱԽ չի աջակցի Հայաստանի դիմումին։ Նշենք, որ ՀՀ դիմումի մեջ բացակայում է ՄԱԿ խաղաղապահների ներգրավման եւ Բերձորի միջանցքը ազերբայդժանի ռազմական ու ոստիկանական ուժերից մաքրելու պահանջը։