Աղդամ-Լաչին գործարքի ձախողումը հանգեցնում է հռետորաբանության սրման

Այն բանից հետո, երբ, ըստ «Կոմերսանտ» թերթի, Լավրովի առաջարկած «աղդամ-լաչին» գործարքը ձախողվեց, և Հայաստանը դիմեց ՄԱԿ-ի Անվտանգության խորհրդին, տեղեկատվական ոլորտում նկատելիորեն ավելացավ էսկալացիան։

Բաքուն տեղեկատվություններ է տարածում, թե իբր հայկական կողմից ուժեր են լուտակվում սահմանի մոտ, և «Ադրբեջանն իրեն իրավասու է համարում պաշտպանել իր տարածքը»։ Բաքվի մամուլում “քսի են տալիս”. «ժամանակն է հակաահաբեկչական գործողություն իրականացնել, քանի որ հայերը սովից չեն մեռնում, ծնկաչոք Աղդամի հաց չեն խնդրում, նույնիսկ դիմում են ՄԱԿ»։

Թուրքիան միացավ տեղեկատվական հարձակմանը` կոչ անելով Հայաստանին «աջակցել» Աղդամի ճանապարհի օգտագործմանը, «ձեռնպահ մնալ սադրիչ քայլերից», ճանաչել Ադրբեջանի տարածքային ամբողջականությունն ու ինքնիշխանությունը, ինչպես նաև «աջակցել հայ բնակչության ինտեգրման հարցում Ադրբեջանի ջանքերին»:

Չնայած, որ Թուրքիայի ԱԳՆ-ն ուղղակի սպառնալիքներ չի հնչեցրել, սակայն հայտարարել է, որ «հասկանում է Ադրբեջանի օրինական մտահոգությունները»։

Բաքուն հայտարարում է, որ «Ադրբեջանի տարածքում ապօրինաբար տեղակայված հայկական զինված ուժերը վերջին շաբաթների ընթացքում ակտիվացրել են ռազմաինժեներական աշխատանքները և այլ ռազմական գործողությունները, ինչը միջազգային իրավունքի, ինչպես նաև Հայաստանի պարտավորությունների լուրջ խախտում է»։

«Նման ապատեղեկատվություն տարածելով՝ Ադրբեջանը տեղեկատվական հող է նախապատրաստում հերթական սադրանքի համար»,- ասված է Արցախի ՊԲ հաղորդագրության մեջ։

Ադրբեջանի տարածած ապատեղեկատվության վերաբերյալ ՀՀ ԱԳՆ հայտարարության մեջ նշվում է, որ կեղծ տեղեկատվության տարածումը վկայում է տարածաշրջանում իրավիճակը սրելու Ադրբեջանի մտադրության մասին։

Իր հերթին Հայաստանում ԵՄ առաքելությունը հայտարարել է. «Ըստ տեղերից ստացված տեղեկատվությունների՝ մենք չենք արձանագրում անկանոն ռազմական տեղաշարժեր կամ շինարարական աշխատանքներ, հատկապես Լաչինի միջանցքի մուտքի մոտ»:

Միաժամանակ տեղեկություններ հայտնվեցին, որ ռուս խաղաղապահները Բաքվի հետ պայմանավորվածությամբ Հայաստան են տեղափոխել Արցախում գտնվող իրենց բազայի քաղաքացիական աշխատակիցներին։ Արցախի նախագահի մամուլի քարտուղարը չհերքեց այս տվյալները՝ նշելով միայն, որ ռուս խաղաղապահներն իրենց տեղաշարժերը չեն համաձայնեցնում Արցախի իշխանությունների հետ։

Տեղեկություններ կան նաև, որ ռուս խաղաղապահների հրամանատարությունը տագնապային լուրեր է տարածում՝ Ռուսաստանի քաղաքացիություն ունեցողներին առաջարկելով «տարհանել» Արցախից։