Մեղրի պահանջարկն Արցախում մեծացել է, գներն էլ աճել են
- 14:09 18.08.2023
Մեղրի պահանջարկն Արցախում մեծացել է, գներն էլ աճել են
Մինչ 2020թ. 44-օրյա պատերազմը Արցախի գյուղատնտեսական զարգացող ճյուղերից էր մեղվաբուծությունը:
Պայմանավորված կլիմայով` մեղվաբուծությունը առավել զարգացած էր Արցախի Քաշաթաղի և Քարվաճառի շրջաններում, որոնց ծավալները թույլ էին տալիս նաև բրենդավորել և արտահանել արցախյան մեղրը:
Պատերազմից հետո թեև մեղվաբուծության ծավալները նկատելի նվազել էին, այնուամենայնիվ ներքին սպառման համար մեղվաբուծության ծավալները բավարարում էին:
Շրջափակման պայմաններում, երբ խնդիր է առաջացել շաքարավազի հետ կապված, բնակչությունը անցել է մեղրի և դոշաբի օգտագործման:
Ըստ մեղվաբույծների, այս տարի ի տարբերություն անցած տարվա նվազել է մեղրի ծավալները և փաստացի այժմ պահանջարկը կրկնակի բարձրացել է, իսկ առաջարկը՝ կրկնակի նվազել:
Նաև, ինչպես մյուս ապրանքատեսակները, մեղրի գները ևս կտրուկ աճել են:
Ըստ մեղվաբույծ Մ.Գ-ի՝ ծավալների նվազման հիմնական պատճառը վառելիքի բացակայությունն է, ինչի արդյունքում չեն կարողացել լրիվությամբ իրականացնել մեղվափեթակների տեղափոխման աշխատանքները։ Գնաճը ևս պայմանավորված է վառելիքի սղությամբ, և նրանք ստիպված են երբեմն կրկնակի վճարել մեղվափեթակների պահպանման վայրեր հասնելու և աշխատանքները իրականացնելու համար:
Քրիստինա Ալահվերդյան