Ինչո՞ւ պետք է մարդիկ հեռանան: Հայը պետք է ապրի իր հողի վրա. Լենա Գրիգորյան

Ավետարանոց գյուղից Լենա Գրիգորյանը, ով կորցրել է ամեն ինչ՝ ամուսնուն, տունը, հայրենի գյուղը, կարծում է, որ պետք է պայքարել հայրենիքի համար.

«Մեր սրբավայրերն այստեղ են, դրանք թշնամուն չենք կարող հանձնել։ Մեր մահացած տղաները ցած են նայում ու նախատում մեզ, որ հանձնել ենք իրենց արյունով ցողվածը։ Ղարաբաղի հողի ամեն մի թիզ արյունով է ցողված. Ղարաբաղը հայկական հող է, և մենք պետք է պայքարենք։ Բայց մեր ղեկավարությունն այնքան է բոլորին ստել, որ մարդիկ կորցրել են հավատը»,- ասում է Լենա Գրիգորյանը։

Պատասխանելով հարցին՝ ինչպե՞ս է վերաբերվում Աղդամի ճանապարհը բացելու առաջարկին, կինն ասում է. «Ինչո՞ւ հայերը պետք է ողորմության համար դիմեն Ադրբեջանին։ Եթե ​​ինչ-որ մեկն ուզում է օգնել, թող ճանապարհը բացի դեպի Հայաստան, ամեն ինչ կարող ենք այնտեղից ստանալ՝ մայր Հայաստանից»։

Մեկնաբանելով Նիկոլ Փաշինյանի երեկվա այն հայտարարությունը, թե Լաչինի միջանցքը կարող է բացվել մեկ ուղղությամբ՝ Արցախից դուրս, ըստ երևույթին, որպեսզի մարդիկ հեռանան, Գրիգորյանը նշեց. «Ի՞նչ է նշանակում միակողմանի։ Ինչո՞ւ պետք է մարդիկ հեռանան: Եթե ​​մարդը հանձնում է իր հողը, ուրեմն դավաճանում է իր ընտանիքին, ծնողներին, երեխաներին։ Հայերը պետք է ապրեն սեփական հողի վրա։ Մենք պետք է սիրենք մեր հողը, մեր սրբավայրերը, ոչ թե տրորենք դրանք»։

Ալվարդ Գրիգորյան