Ստիպված էի հեռանալ, այդպես էլ չհասկանալով, թե ո՞վ ինչի համար է պատասխանատու
- 15:58 05.09.2023
Ալյուրի սղության պատճառով սեպտեմբերի 4-ից Արցախում սկսեցին բաժանվել հացի կտրոններ։
Ըստ կտրոնային համակարգի՝ Արցախի 1 բնակչին օրական հասնում է 200 գրամ հաց։
Կտրոնների բաժանումը իրականացվում է Ստեփանակերտի 9 կետերում, և դրանք ստանալու համար անհրաժեշտ է ներկայանալ կետերից մեկը` անձնագրով և հանրային ծառայությունների համարանիշով։
Այդ պրոցեսը նկարահանելու նպատակով այսօր այցելեցի կետերից մեկը, որտեղ ինձ խնդրեցին սպասել՝ նկարահանման համար թույլտվություն ստանալու համար։ Առաջին զանգը եղավ սոցապ նախարարություն, որոնք ինչպես պարզվեց, չունեն թույլատրելու արտոնություններ, և խորհուրդ տվեցին կապվել ոստիկանության հետ։ Տեղի ոստիկանության աշխատակիցը կապվեց ոստիկանության ղեկավարության հետ, և պարզվեց,որ վերջիններս նույնպես չունեին թույլտվության արտոնություն։ Ինձ կրկին խորհուրդ տվեցին կապվել սոցապ նախարարության հետ։
Կես ժամ այնտեղ կանգնելուց հետո ստիպված էի հեռանալ, այդպես էլ չհասկանալով, թե ո՞վ ինչի համար է պատասխանատու։
Հայկ Հարությունյան