ԿԽՄԿ Ստեփանակերտի գրասենյակի հայտարարությունը Ռուսաստանի Կարմիր Խաչի կողմից Արցախ ուղարվելիք օգնության վերաբերյալ
- 18:38 11.09.2023
Ի պատասխան Step1.am-ի հարցման` ռուսական Կարմիր խաչի Արցախ ուղարկվելիք մարդասիրական օգնություն մասին՝ ԿԽՄԿ Ստեփանակերտի գրասենյակը ներկայացրել է հետևյալ հայտարարությունը.
«Մենք հերքում ենք այն պնդումները, թե ԿԽՄԿ-ն խոչընդոտում է Ռուսաստանի Կարմիր Խաչի կողմից օգնություն տրամադրելու ջանքերին կամ առաջ է տանում որևէ քաղաքական օրակարգ: Մարդասիրական օգնությունը թույլ տալու որոշում կայացնելու իրավունքը՝ միայն որոշում կայացնողների ձեռքում է:
Մեր առաքելությունը զուտ մարդասիրական է՝ օգնություն ցուցաբերել նրանց, ովքեր դրա կարիքն ունեն ամենաշատը՝ չեզոքության, անկողմնակալության և անկախության մեր հիմնարար սկզբունքներին համապատասխան։ Անցած շաբաթվա ընթացքում ԿԽՄԿ-ն բանակցություններ է վարել որոշումներ կայացնողների և Կարմիր խաչի և Կարմիր մահիկի մեր գործընկերների հետ՝ Լաչինի և Աղդամի ճանապարհներով օգնություն փոխադրելու տարբերակների շուրջ: Կազմակերպությունը գործում է թափանցիկ, համակարգում է իր գործունեությունը բոլոր որոշում կայացնողների հետ և միայն նրանց համաձայնությամբ»: