Արցախի հերոսական ժողովուրդը մի բան չկարողացավ անել՝ վերահսկել սեփական իշխանություններին․ Գեղամ Բաղդասարյան

Արցախի բնակչությունն անասելի զրկանքներ կրեց՝ հանուն ազատության և անկախության։ Չեմ կարծում, թե մեկ այլ ժողովուրդ, մեկ այլ հանրություն ի զորու կլիներ դիմանալ նման փորձությունների՝ չթողնելով, որ մեռնի պայքարի ոգին ու դրանով իսկ այդքան մեծ շանս տալով իշխանություններին՝ գործուն քայլեր ձեռնարկելու թե մեր քաղաքական օրակարգը աշխարհին համոզիչ կերպով ներկայացնելու և թե շրջափակման պայմաններում ներքին կյանքն արդյունավետ կազմակերպելու համար։ Բայց իշխանությունները ձախողեցին երկուսն էլ։

Երկար դիմացան արցախցիները, մեծ փորձությունների դիմակայեցին ու անասելի զրկանքներ կրեցին, ուստի ցավալի է, շատ ցավալի է նման քաղաքական արդյունքը, ավելի ճիշտ՝ զրո արդյունքը։ Շատ ցավալի է, որ քաղաքական իմաստավորում չստացան այդ զրկանքները։ Այդպես է լինում, երբ քաղաքական էլիտայի փոխարեն տնտեսական շահախմբեր են ձևավորվում։ Այդպես է լինում, երբ քաղաքական օրակարգ չի լինում, երբ քաղաքական հաստատություններն ապաքաղաքական են լինում, ու ինքը երկիրը դադարում է քաղաքական միավոր լինելուց։

Այդպես է լինում, երբ հանրությունը չի կարողանում վերահսկել իշխանություններին։ Իսկ սեփական ժողովրդի կողմից չվերահսկվող իշխանությունները, որպես կանոն, վերահսկվում են այլոց կողմից։