Պեսկովը «Ադրբեջանի ռազմական գործողության ֆոնին” մտածում է Ղարաբաղի խաղաղ բնակչության անվտանգության մասին

ՌԴ նախագահի մամուլի քարտուղար Դմիտրի Պեսկովը հայտարարել է, որ ռուս զինվորականները փորձում են Լեռնային Ղարաբաղում գործընթացը վերադարձնել քաղաքական-դիվանագիտական հուն: «Արմենպրես»-ի հաղորդմամբ՝ այս մասին հայտնում է «ՌԻԱ Նովոստի»-ն՝ վկայակոչելով նրա հայտարարությունը:

«Ադրբեջանի զինված ուժերի կողմից իրականացվող ռազմական գործողության ֆոնին մեզ համար առաջնայինը Ղարաբաղի խաղաղ բնակչության անվտանգության ապահովումն է։ Խոսքն, իհարկե, հայ բնակչության մասին է։ Դրա համար պետք է ձեռնարկվեն բոլոր անհրաժեշտ միջոցները: Ռուս զինվորականները փորձում են Լեռնային Ղարաբաղի գործընթացը վերադարձնել քաղաքական-դիվանագիտական հուն: Դրա համար միակ երաշխիքը ստորագրված եռակողմ փաստաթղթերն են», – ասել է Պեսկովը լրագրողներին:

Նա չի հաստատել, որ Ադրբեջանը Ռուսաստանին նախապես զգուշացրել է Լեռնային Ղարաբաղում պատրաստվող գործողության մասին:

«Ես չեմ կարող հաստատել, որ մենք նախապես տեղյակ ենք պահվել»,-պատասխանել Է Պեսկովը լրագրողներին այն հարցին, թե արդյոք Բաքուն Մոսկվային տեղյակ է պահել ծրագրերի մասին:

Նա ընդգծել է, որ Կրեմլը ցավով է իմանում, որ Լեռնային Ղարաբաղում արդեն կան զոհեր, ռազմական գործողությունների վերսկսումը լուրջ մարտահրավեր և սպառնալիք է խաղաղ բնակչության համար:

«Ինչ վերաբերում է մեր խաղաղապահների զորակազմի ավելացմանը, ապա առաջին հերթին ձևակերպվում է առաջարկը մեր զինվորականների կողմից, և, իհարկե, դա ենթակա է համաձայնեցման բոլոր կողմերի հետ», – պատասխանել Է Պեսկովը լրագրողների այն հարցին, թե արդյոք չի նախատեսվում ավելացնել ՌԴ խաղաղապահ զորակազմը Լեռնային Ղարաբաղում:

ՌԴ նախագահ Վլադիմիր Պուտինն ու Հայաստանի վարչապետ Նիկոլ Փաշինյանը Փաշինյանի ուղարկած նամակից հետո կապի մեջ չեն եղել, ասել է ՌԴ նախագահի մամուլի քարտուղար Դմիտրի Պեսկովը։

«Իսկապես, եղել է մանրամասն նամակ, որտեղ շարադրված է հայկական կողմի տեսակետը տեղի ունեցողի վերաբերյալ։ Այդ ժամանակ աշխատանքներ էին տարվում Ղարաբաղ մարդասիրական օգնության հոսքը վերականգնելու ուղղությամբ։ Եվ ի գոհունակություն մեզ, երեկվա դրությամբ այս աշխատանքը պսակվել է հաջողությամբ։ Առաջին խմբաքանակը երկու ուղղությամբ գնաց Աղդամի և Լաչինի ճանապարհներով, սակայն, ցավոք, դա մեզ չփրկեց ռազմական գործողությունների վերսկսումից։ Դրանից հետո այլ շփումներ չեն եղել»,- ասել է Պեսկովը։

Պեսկովն ասել է նաեւ, որ Ռուսաստանը կապի մեջ է և՛ Հայաստանի, և՛ Ադրբեջանի հետ՝ կապված Լեռնային Ղարաբաղում իրավիճակի հետ, սակայն շփումները ռազմական գծով են տեղի ունենում։

«Շփումներն իրականացվում են ռազմական գծով, ինչպես նաև այլ գերատեսչությունների միջոցով։ Համաձայնեցվում է ավելի բարձր մակարդակով շփումներ իրականացնելու հնարավորությունը։ Վերջնական պայմանավորվածության հանգելու դեպքում հավելյալ տեղեկատվություն կներկայացնենք։ Խոսքը այդ թվում՝ ամենաբարձր մակարդակով շփումների մասին է»,- ասել է Պեսկովը։