ՌԴ ԱԳՆ պաշտոնական ներկայացուցիչ Մարիա Զախարովան ծավալուն մեկնաբանել է Ադրբեջանի նախագահ Իլյամ Ալիեւի հավակնությունները Սյունիքի հանդեպ եւ նրա պնդումները, թե Խորհրդային Միությունը «Զանգեզուրը տվել է Հայաստանին»։

Նրա խոսքով՝ այժմ ժամանակը չէ մեկնաբանելու պատմությունը՝ տեղերում իրավիճակի դինամիկ զարգացումը հաշվի առնելով։ «Այժմ իրավիճակը դինամիկ զարգանում է, եւ այն պահանջում է ավելի շատ օպերատիվ մեկնաբանություններ, քան դա պահանջում է պատմությունը»,- նշել է նա։

Զախարովան հայտնել է, որ Հայաստանը եւ Ադրբեջանը ընդունել են միմյանց տարածքային ամբողջականությունը։ «Նրանք կառաջնորդվեն այդ սկզբունքով իրենց գործողություններում։ Այս մասին կողմերը հայտարարել են։ Ռուսական կողմը շահագրգռված է Անդրկովկասում կայուն իրավիճակով, նա հանդես է գալիս բոլոր վիճելի հարցերը քաղաքական-դիվանագիտական ճանապարհով լուծելու օգտին։ Ընդ որում, թե՛ Հայաստանը, թե՛ Ադրբեջանը մեզ դաշնակից երկրներ են։ Երեւանի հետ մեզ կապում են պարտավորություններն անվտանգության ոլորտում ինչպես երկկողմ ձեւաչափով, այնպես էլ ՀԱՊԿ շրջանակում։ Բաքվի հետ հաջողությամբ իրականացվում է դաշնակցային փոխգործակցության հռչակագիրը։

Ինչ վերաբերում է  տարածաշրջանում տրանսպորտային հաղորդակցությունների ապաշրջափակման թեմային,  այդ հարցը ամենամանրակրկիտ ձեւով դիտարկվում է եռակողմ աշխատանքային խմբի գծով՝ ՌԴ, Հայաստանի եւ Ադրբեջանի փոխվարչապետերի համանախագահությամբ։

Մենք համոզված ենք, որ հենց այս ձեւաչափով կարող է եւ պետք է գտնվի փոխընդունելի որոշումը, որը կերաշխավորի երկրներից յուրաքանչյուրի ինքնիշխանությունը եւ իրավազորությունը այն երթուղիների հանդեպ, որոնք անցնում են նրա ազգային տարածքով։ Նման պայմանավորվածությունները՝ հիմնված շահերի հավասարակշռության վրա, օգուտ կբերեն ինչպես տարածաշրջանի պետություններին, այնպես էլ նրանց հարեւաններին, ներառյալ Ռուսաստանը, Թուրքիան եւ Իրանը»,-  նշել է նա։

Lragir

Արցախի դեմ Ռուսաստանի առաջնորդությամբ Բաքվի լայնածավալ հարձակումից եւ բնիկ մեծամասնության տեղահանության մեկնարկից հետո Ֆրանսիայի նախագահ Մակրոնը հայտարարեց, որ «Ռուսաստանն է աջակցել Բաքվին, Ռուսաստանը հանցակից է Բաքվին»։

Իր հերթին, ԱՄՆ պետքարտուղարության խոսնակ Մեթյու Միլլերը Արցախում ստեղծված իրավիճակի եւ Հայաստանի ինքնիշխանությանը սպառնացող վտանգի համատեքստում հայտարարեց, որ «Ռուսաստանն անվտանգության ոլորտում հուսալի գործընկեր չէ»։

Ռուսաստանի հանցակցության փաստը ավելի ու ավելի է ընդգծվում համաշխարհային, այդ թվում ռուսական, մամուլի հրապարակումներում եւ Եվրոպական խորհրդարանի քննարկումներում։ Ռուսաստանը ամուր կապվում է ազերբայդժանին եւ հռչակվում նրան հանցակից։ Հեռու չէ օրը, երբ Ռուսաստանին կարող է նեկայացվել ամբողջական մեղադրանքը՝ Հայաստանի (Արցախը ներառյալ) դեմ ահաբեկչական ռազմական արշավի եւ ցեղասպանական գործողությունների նախաձեռնող եւ երաշխավոր։

Սա վաղուց պետք է արվեր, եւ չի արվել բացառապես ՀՀ իշխանության մեջ ներդրված նիկոլ-քպ ագենտուրայի եւ նրա հենակ ռուսապատկան «ընդդիմության» ջանքերով՝ միջազգային հնարավոր ու անհնար ատյաններում հայկական իրավունքների եւ դրանց հիմքով Արցախի խնդրի քաղաքական կարգավորման հնարավորությունների հետեւողական չեզոքացմամբ։ Անտեսվել են միջազգային կառույցների բանաձեւերը, որոնցում արձանագրված է միջազգային երեք հիմնարար սկզբունքների հիման վրա Արցախի խնդրի կարգավորման անհրաժեշտությունը։

Քաղաքական խնդիրները նենգափոխվել են հումանիտարով, կոպիրկինյան խորհրդարանը հրաժարվել է հայկական իրավունքների հիմնարար խնդիրների շուրջ քննարկումներից ու որոշումների կայացումից։ Ամեն ինչ արվել է Հայաստանի դեմ Մոսկվայի ցեղասպան արշավի «օրինականացման» համար, այն պարագային, երբ իրավունքը ամբողջովին հայկական կողմում է, առավել եւս հիմա, որքան էլ տարօրինակ թվա։

Ռուսաստանի հեռանալու գինը Արցախը ու Հայաստանի պետականությունը չպետք է լինի ու չի լինելու, իսկ «Արցախի կորստի» վրա դիակապտությամբ զբաղվողները դաժան պատժի են ենթարկվելու։

Գանձասար

Արցախյան պատերազմի հետեւանքով ավերվել է աշխարհի հնագույն քրիստոնեական համայնքներից մեկը։ Աշխարհի հնագույն եկեղեցիներից շատերն այժմ գտնվում են պղծման կամ քանդման սպառնալիքի տակ: Այս մասին ասվում է Christian solidarity International (CSI) կազմակերպության հաղորդագրության մեջ։

«CSI-ի հավատարմությունը հայ ժողովրդին` առաջին քրիստոնյա ազգին, շարունակվում է: Մենք շտապ օգնություն ուղարկեցինք Հայաստանի հարավ՝ Լեռնային Ղարաբաղից 120,000 փախստականների կարիքները հոգալու համար։ Նրանց ճանապարհը դեպի վերաբնակեցում կլինի երկար ու դժվար։ Այս կարիքները բավարարելու համար մենք աշխատում ենք Հայաստանում գործընկերների հետ:

Մենք բանակցում ենք նաև Հայաստանում Քերոլայն Քոքսի վերականգնողական կենտրոնի վերականգնման շուրջ։ Ավելի քան 20 տարի Կենտրոնը ժամանակակից օգնություն է ցուցաբերում 1988-1994, 2016 և 2020 թվականների Ղարաբաղում տեղի ունեցած պատերազմների հետևանքով հաշմանդամություն ունեցող և վիրավորներին։ Տա Աստված, որ այս գործը շարունակվի։

Հայ ժողովրդին սպառնացող վտանգը չի անցել. Հայոց ցեղասպանությունը փուլ առ փուլ տեղի է ունեցել 1894 թվականից։ Իսլամական գերակայության և պանթյուրքիստական ​​ազգայնականության գաղափարախոսությունները կարծես պահանջում են ոչնչացնել այս ազատ քրիստոնյա ժողովրդին: Թուրքիան և Ադրբեջանն արդեն սպառնալից քայլեր են անում Հայաստանի հարավի նկատմամբ, իսկ ադրբեջանական պետական ​​քարոզչությունը Հայաստանի Հանրապետության մեծ մասը կամ ամբողջը հռչակել է «Արևմտյան Ադրբեջան» եւ հայտարարել՝ «մենք պետք է այնտեղ վերադառնանք»։