Oդագնացության միջազգային փառատոնն այս տարի հյուրընկալել է ԼՂ-ից բռնի տեղահանված երեխաներին
- 16:15 16.10.2023
Հայաստանում շարունակվում է «Բացահայտիր Հայաստանը երկնքից» օդագնացության միջազգային փառատոնը, որն այս տարի հյուրընկալել է նաև Լեռնային Ղարաբաղից բռնի տեղահանված երեխաներին: Օդապարիկով թռավ նաև արդեն բոլորին հայտնի 13-ամյա Գոռը, ով շուրջ 55 ժամ մեքենան վարելով ընտանիքին հասցրել էր Հայաստան:
«Արմենպրես»–ի հետ զրույցում Լեռնային Ղարաբաղի Խնապատ գյուղում ծնված Գոռ Խաչատրյանն ասաց, որ շատ է ոգևորված է: «Առաջին անգամ է, որ թռնում եմ, մի փոքր վախենում եմ»,-ասաց Գոռը:
Օդագնացության միջազգային փառատոնին մասնակցելու համար Գոռին հրավիրել էր Ֆլայ Արնա ավիաընկերությունը:
«Սքայբոլ» ավիաընկերության տնօրեն Նաիրի Բարսեղյանն ընդգծեց , որ փառատոնը բաղկացած է 2 փուլերից՝ ցուցադրական և մարզական։ Ցուցադրական փուլն իր մեջ ներառում է օդապարիկների ազատ թռիչքներ Երևանի, Գառնու, Ապարանի օդային տարածքում։ Նա ընդգծեց, որ ցուցադրական թռիչքների ժամանակ ներգրավել են նաև ԼՂ-ից բռնի տեղահանված երեխաներին:
«Այս տարի մեր փառատոնի շրջանակում որոշեցինք, որ կմասնակցեն և օդապարիկով կթռնեն նաև 6-ից 12 տարեկան ԼՂ-ից բռնի տեղահանված երեխաները»,-ասաց նա:
Փառատոնի մեկնարկը տրվել է Երևաից, իսկ այս տարի փառատոնին մասնակցում են մինչև 20 օդապարիկներ ՀՀ-ից, Բրազիլիայից, Բուլղարիայից, Գերմանիայից, Լիտվայից, Լեհաստանից, Ճապոնիայից, Մեծ Բրիտանիայից, Ռուսաստանից և Վրաստանից:
«Բացահայտիր Հայաստանը երկնքից» օդագնացության փառատոնն արդեն 5-րդ անգամ է անցկացվում։ Առաջին փառատոնն անցկացվել է 2017 թվականին։ Նաիրի Բարսեղյանը նշեց, որ նպատակ են դրել այն դարձնել ամենամյա, ամեն տարի անցկացնել ու ծավալներն ընդլայնել։