Շահրամանյանը պարտավոր է բացատրել, թե ինչ փաստաթղթի տակ է իր ստորագրությունը
- 10:06 18.10.2023
Ստեփանակերտի քաղաքապետ Դավիթ Սարգսյանը հայտարարել է, որ Արցախի խորհրդարանի կողմից ընտրված նոր նախագահը չի ստորագրել Արցախի Հանրապետության լուծարման մասին որևէ փաստաթուղթ։ Հայկական մամուլում և սոցիալական ցանցերում շրջանառվում են քաղաքապետի պնդումները, թե նախագահ Սամվել Շահրամանյանն անձամբ է մի հանդիպման ժամանակ հայտարարել, որ ինքը նման փաստաթուղթ չի ստորագրել։
Լրագրողի այն պնդումը, որ եղել է Արցախի Հանրապետության հունվարի 1-ից լուծարման մասին հրամանագրի պաշտոնական հայտարարությունը, չի ազդել Ստեփանակերտի քաղաքապետի վրա, նա համոզիչ պնդում է, որ Շահրամանյանը չի ստորագրել, նման փաստաթուղթ չկա։
Բայց այդ դեպքում շատ հարցեր են ծագում։ Ավելին, դեռ Ստեփանակերտում, երբ տեղահանությունը եռում էր, ասում էին, որ «ռուսները ստորագրության են ներկայացրել Արցախի լուծարման մասին պատրաստի փաստաթուղթ», իսկ Շահրամանյանին հրամայել են «ձենդ կտրի, լսի և կատարի»։
Այդուհանդերձ, ավելի ճիշտ կլինի, որ ինքը՝ Սամվել Շահրամանյանը, հայտարարություն աներ ու բացատրեր, թե ինչ է ստորագրել, ինչ չի ստորագրել։
Ի՞նչ են փորձում փոխանցել Ստեփանակերտի քաղաքապետի շուրթերով։ Փրկո՞ւմ են Շահրամանյանի համբավը։ Թե՞ աշխարհաքաղաքականությունը որոշել է փրկել Արցախը։
Հետաքրքիր կլիներ լսել նաև, այսպես կոչված, ղարաբաղյան վերնախավի «տուսովկային», որը հավաքվում է Ն.Զարյան 17ա հասցեում։