Արցախում տեղի ունեցածը հանցագործություն ու ապամարդկայնացման գործողություն չէր, Զախարովա
- 10:52 18.10.2023
ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, թե Ռուսաստանը Գազայի հիվանդանոցի վրա հրթիռային հարձակումը որակում է որպես հանցագործություն և ապամարդկայնացման գործողություն։ Ինչպես միշտ, «արեւմտյան բլոկն է մեղավոր հակամարտության գոտում հումանիտար աղետալի իրավիճակի համար։ Այս ամենն ուղղորդվում է Վաշինգտոնից և Լոնդոնից», ասել է Զախարովան։
Շուտով կպարզվի, թե հակամարտության գոտում ով եւ ինչ է ուղղորդում։ Սա՝ իմիջիայլոց։
Նման գնահատական Արցախում վերջին երեք տարիներին, երբ Մոսկվան Արցախը համարում էր իր «պատասխանատվության գոտի», Մոսկվայից չի հնչել․ ոչ Բաքվի ռազմական հանցագործությունների, ոչ շրջափակման, ոչ էլ հայերի սպանությունների ու արտաքսման կապակցությամբ։ Ավելին, Կրեմլի ու ՌԴ ԱԳՆ գոպնիկների կողմից դրանք արդարացվել են, այդ թվում «արեւմտյան բլոկն է» մեղավոր ատմազկայով։
Հասկանալի է, թե ինչու չի հնչել՝ Ռուսաստանը իր «պատասխանատվության գոտում» ռազմական հանցագործությունների ու ցեղասպանության ծրագրողն ու առաջնորդողն էր գետնի վրա օպերատիվ երաշխավորությամբ։ Իսկ Ստեփանակերտի վառելիքի բազայի դիվերսիան, որին զոհ գնացին հարյուրավոր հայեր, ռուսական ստոր առաքելության «պսակն» էր։
Lragir