Արցախից փախստականների խնդիրներով այսուհետ կզբաղվի Հայաստանի կառավարությանն առընթեր Մարդասիրական կենտրոնը
- 16:31 23.10.2023
Այսուհետ ՀՀ կառավարությանն առընթեր Մարդասիրական կենտրոնն է համակարգելու Արցախից հարկադիր տեղահանված անձանց աջակցության աշխատանքները, այդ թվում՝ առողջապահության, կրթության, սոցիալական աջակցության և այլ նմանատիպ հարցեր։
«Արցախի քաղաքացիները ծագած բոլոր հարցերով կարող են զանգահարել ՀՀ աշխատանքի և սոցիալական հարցերի նախարարության շուրջօրյա թեժ գծին՝ 114 հեռախոսահամարով, կամ դիմել Հայաստանի սոցիալական ծառայության տարածքային կամ մարզային կենտրոններ։ 2020 թվականից Երևանում գործող Արցախի (Լեռնային Ղարաբաղի) օպերատիվ շտաբը կդադարեցնի աշխատանքը։
Ինքը՝ օպերատիվ շտաբը, նշում է, որ ներկայումս ընթացքի մեջ է բոլոր գործերն ու ծրագրերը Մարդասիրական կենտրոնին փոխանցելու գործընթացը։ Այս գործընթացը կտևի մինչև ամսվա վերջ, ուստի առաջիկա 7-8 օրվա ընթացքում Արցախի քաղաքացիներին ոչ Արցախի օպերատիվ շտաբում, ոչ էլ Հայաստանի մարդասիրական կենտրոնում որևէ կոնկրետ բան չի հաջողվի պարզել։
Մինչ այս շաբաթվա վերջ Արցախի օպերատիվ շտաբում կգործի միայն Հադրութի ԶԱԳՍ-ը։