«Արցախ, ներողություն, Լեռնային Ղարաբաղ»։ Ումի՞ց եք ներողություն խնդրում
- 11:50 22.11.2023
ԱԺ արտահերթ նիստում «Հայաստան» խմբակցության պատգամավոր Արթուր Խաչատրյանն ուշադրություն հրավիրեց այն հանգամանքի վրա, որ ՀՀ կառավարությունն Արցախից բռնի տեղահանված անձանց աջակցություն ցուցաբերելու նախագծերում գրել է «Լեռնային Ղարաբաղ»։ ««Լեռնային Ղարաբաղ» ի՞նչ, Լեռնային Ղարաբաղի Հանրապետություն կամ Արցախի Հանրապետություն։ Քաղաքական մեծամասնությունը, իշխանությունները չեն օգտագործում, վախենում են օգտագործել «Արցախի Հանրապետություն» եզրույթը։ Բանը հասել է նրան, որ կառավարության անդամն ասում է՝ «Արցախ, ներողություն, Լեռնային Ղարաբաղ»։ Ումի՞ց ներողություն, ումի՞ց եք ներողություն խնդրում՝ Արցախ բառն օգտագործելու համար։ Կարծում եք՝ թուրքի պահանջի առաջ ընկրկելով՝ հետաձգո՞ւմ եք պատերազմը։ Ինչքան զիջումների եք գնում, չեք տեսնո՞ւմ, որ թուրքն ավելի է մոտեցնում մեր դռներին, մեր հայրենիքին, ավելի է մոտենում Երեւանին»,- ասաց Արթուր Խաչատրյանը։ Այդ մասին հայտնում է Step1.am-ի թղթակիցի ԱԺ-ում։
Նա նշեց, որ Հայաստանի Հանրապետությունը պարտավոր է բոլոր ջանքերը գործադրել՝ ապահովելու Արցախից բռնի տեղահանված, էթնիկ զտման եւ ցեղասպանության ենթարկված մեր հայրենակիցների արժանապատիվ, բարեկեցիկ կյանքը ՀՀ-ում՝ մինչեւ մեր հայրենակիցները կկարողանան վերադառնալ իրենց հայրենիք, իրենց տուն՝ Արցախի Հանրապետություն՝ մինչեւ Արցախի Հանրապետության քաղաքական կարգավիճակի ճշգրտումը՝ հիմնվելով ժողովուրդների իրավահավասարության եւ ինքնորոշման իրավունքի վրա։