Սոցիալական մեդիա  մարքեթինգի  դասընթացներ  արցախցիների համար

Դեկտեմբերի 5-ին մեկնարկեցին Սոցիալական Մեդիայի Մարքեթինգի (SMM) դասընթացները ՀԱՀ Բաց կրթության հետ։ Արագորեն տրանսֆորմացվող աշխատաշուկայում արցախցիները փորձում են ֆրիլանս կամ հեռավար աշխատանքներ գտնել, ինչն ավելի ձեռնտու է ստեղծված իրավիճակով պայմանավորված: Կրճատվում են տարածքի վարձակալման, կոմունալ ծախսերը, խնայվում են տրանսպորտի համար նախատեսված գումարն ու ժամանակը: ՍՄՄ-ը մրցունակ, պահանջված, եկամտաբեր ֆրիլանս մասնագիտություններից է: Աշխատանք գտնելու համար փորձ է անհրաժեշտ, որն էլ արցախցիները ձեռք են բերելու օնլայն դասընթացների միջոցով:

Դասընթացները տրամադրելու են  անհրաժեշտ գիտելիքներն ու գործիքները ոչ միայն սոցիալական մեդիայի մարքեթինգի հիմունքներին տիրապետելու, այլ նաև այն գործնականում կիրառելու համար։

Դասընթացի ընթացքում մասնակիցներն ուսումնասիրելու են հիմնական մարքեթինգային հիմունքները, թվային մարքեթինգի հիմունքները, սոցիալական մեդիայի ալգորիթմները, կոնտենտի ստեղծման գործիքները, գովազդների ստեղծման և կառավարման առանձնահատկությունները։

Դասընթացը հագեցած է լինելու գործնական աշխատանքներով, ինչն էլ ավելի է ամրապնդելու ձեռք բերված գիտելիքները։ Մարզաբնակ արցախցիների համար գործում է հավելյալ զեղչ: Դասընթացների լեզուն հայերենն է: Անցկացվելու են շաբաթական երկու անգամ՝ մեկ ամսվա ընթացքում:

Ոչ ստանդարտ դասընթացների սկզբնական շրջանում ուսոումնասիրվելու են մարքեթինգի հիմքերը: Հեղինակային դասընթացները պարունակում են օգտակար նյութերի հղումներ, տարիների ընթացքում մշակված ֆայլեր, մասնագիտական տերմինների բառարան:

Step1.am-ի լրագրողի այն հարցին, թե արդյոք արհեստական բանականությունը կարող է լրիվությամբ փոխարինել SMM-ին, դասընթացավարի պատասխանը բացասական էր:

Մարքեթինգը հիմնված է էմոցիաների, մարդկային ռեսուրսների վրա, իսկ արհեստական բանականությունը դեռևս զուրկ է դրանցից: Դրական տեսանկյունից արհեստական բանականության գործիքների կիրառումը օգնում է պրակտիկայում: Առաջընթաց գրանցելու հարցում պարտադիր պայման է մարդկային գործոնը:

Տաթև Ազիզյան