Մի օր Հայաստանում Շուշիի գորգի թանգարանը կդառնա պետական ու ազգային
- 11:26 11.12.2023
«Շուշիի գորգի թանգարանի ցուցանմուշները, որոնց մասին ավելի վաղ գրել էինք, գտնվում են մասնավոր տարածքում»,- ասում է թանգարանի տնօրեն Վարդան Ասծատրյանը։
«Գորգերը գտնվում են մասնավոր տարածքում, քանի որ պետական իշխանությունները ոչ միայն հրաժարվում են տարածք տրամադրել թանգարանին, այլև արգելում են դրանց ցուցադրությունը այլ պետական թանգարաններում։ Նախկինում ինձ առաջարկել էին դրանք կա՛մ ցուցադրել այլ թանգարաններում՝ խառնված այլ ցուցանմուշների հետ՝ առանց նախկին անունը նշելու՝ «Շուշիի գորգի թանգարան», կա՛մ ասում էին, որ չեն կարող տեղ հատկացնել, քանի որ «Շուշիի գորգերը» մասնավոր հավաքածու է։ Կրթության և մշակույթի ոլորտի պաշտոնյաների շուրթերից նման հայտարարությունն իմ տեսանկյունից անընդունելի է։ Մինչ այս մասին խոսելը, խորհուրդ կտամ, որ պատշաճ կերպով ուսումնասիրեն թանգարանների պատմությունը։ Աշխարհում շատ հայտնի թանգարաններ ստեղծվում են մասնավոր հավաքածուների հիման վրա, և այս հանգամանքը նման արգելքների պատճառ չի կարող լինել։ Պատճառն, ավելի շուտ, կայանում է նրանում, որ դա հակասում է ներկայիս իշխանությունների քաղաքականությանը, որոնք պատրաստվում են խաղաղության պայմանագիր կնքել մեր հարեւանների հետ։ Ադրբեջանին դուր չի գա Հայաստանի տարածքում արցախյան գորգի թանգարան բացելու փաստը, իսկ մեր երկրի ներկայիս ղեկավարությունը դա թույլ տալ չի կարող։
Սակայն ժամանակները փոխվում են, բայց մշակութային և պատմական արժեքները մնում են՝ փոխանցվելով սերնդեսերունդ։ Շուշիի թանգարանը տարբերվում է բազմաթիվ թանգարաններից, նրա ցուցանմուշները եզակի են նրանով, որ ունեն ծագման կոնկրետ պատմություն, ինչպես նշում են աշխարհի հայտնի փորձագետները: Այս թեմայով ես գրել եմ բազմաթիվ գիտական աշխատություններ: Վաղ թե ուշ թանգարանն անպայման իր դռները կբացի Հայաստանի տարածքում և կլինի պետական ու ազգային, ես անկեղծորեն ուզում եմ հավատալ դրան»,- step.am-ի հետ զրույցում ասաց Վարդան Ասծատրյանը։
Արսեն Աղաջանյան
